Зууны манлай нар даллагын авдараар буян үйлдлээ

Хос дээл, хос бүрх малгай, хос ятга гэхээр таны санаанд "Зууны манлай" хос дуучин МУГЖ С.Вандан, МУГЖ  дуучин Д.Дуламсүрэн нар бууж байгаа биз ээ. Тэдний уран бүтээлийг сонсож үзээгүй  Монгол хүн гэж үгүй. Орчин цагийн алтан дуучид алтан үеийнхээ аялгуут дуунуудыг орчин цагийн хөгжмөөр баяжуулж, үзэгч түмэндээ хүргэсээр байгаа билээ. 

Сүүлийн үед Тулганы галаа хамтдаа ноцоож, Тооноо өргөсөн ижил заяа, Томоогүй алдааг минь уучилж хайрласан, Тэнгэрлэг хань минь чамдаа хайртай... хэмээн залуучууд аялах болсон.

30 гаруй жил ханилан нэг биеийн хоёр тал болсон хос дуучид маань өдгөө ч тайзнаа үзэгч олныгоо дуугаараа уяраасаар... Саяхны нэгэн тоглолтод зуун манлай нар маань даллагын авдарыг дурын хүндээ бэлэглэх тохиол таарч, үзэгчдийн дундаас нэгэн настан буурайг сонгон бэлгээ гардуулж баярлууллаа.