Н.Онон хамтлагийнхаа охины нулимсыг унагав

Н.Онон захиралтай Х Түц продакшны хамт олон Монголчуудыгаа олон жил инээлгэсэн  хошин урлагийн шилдэг хамтлаг мөнөөс мөн. Энэ хамтлагаас салбарлан гарч бие даасан болон тусдаа хамтлаг болсон олон залуус бий. Өөрөөр хэлбэл Н.Онон, И.Одончимэг нар жүжигчин Батаа, Нарансолонго, Тэмкагаас эхлээд олон уран бүтээлчдийг хөлийг дөрөөнд, гарыг нь ганзаганд хүргэсэн ачтангууд. Тиймдээ ч залуу уран бүтээлчид Х Түцийг үүсгэн байгуулагчид болох Н.Онон, И.Одончимэг нарыг аав, ээж шигээ хайрдаж, хүндэтгэдэг юм билээ.

Ийн залуу хойч үеийнхээ хайр хүндэтгэлийг хүлээж бас даасан дааж яваа Н.Онон өчигдөр “Хөөрхөн ээжтэй охин” ээлжит уран бүтээлийнхээ нээлтийн үеэр хамтлагт нь олон жил бүжигчнээр ажилласан н.Заяа гэх бүсгүйд СТА болсныг нь дуулгаж, тэмдэгийг нь гардуулан өглөө. Гэнэтийн үйл явдалд цочирдсон Заяа гэх охин нь баярын нулимс дуслуулж харагдана лээ. Энэ бүсгүй нь жаахан охин байхаасаа эхлээд X Түц-д харъяалагдан ажиллаж эхэлсэн бөгөөд өдгөө үр хүүхэдтэй ээж болсон ч хамтлагтаа эргэж буцалтгүй ажилласаар байгаа аж.

Дашрамд дуулгахад Х Түц нь хошин урлагаас холдож цаашид дэлгэцийн бүтээлээр дагнаж уран бүтээлээ туурвих ажээ.