Тэр нугадаа дураар цахилах гөрөөс

Эх орондоо төдийгүй гадны орнуудад хэр зэрэг чадварлаг модель болохоо харуулсан мисс Т.Туяамаа хэсэг хугацаанд нөхрийн хамт Авсрали улсад ажиллаж амьдараад ирсэн. Хүний нутагт ажиллахдаа тус улсын томоохон брэндийн нүүр царай болж, мөн өөрийн ур чадвараа дээшлүүлж суралцаад амжсан гэдэг. Тиймээс ч саяхнаас миссүүдийг боловсролд анхаарч сургалтын төв хүртэл нээсэн сурагтай. Учир нь манай мисс охидуудыг үргэлж нэгэн шүүмжлэл дагадаг нь боловсрол тэр тусмаа хэлний боловсрол. Энэхүү сургалтын төвөөрөө үндэсний хэл, соёлоос эхлээд англи хэл, тайзны алхаа гишгээ гээд мисс болоход шаардагдах бүхий л зүйлийг заах юм билээ. Тэрээр саяхан болж өнгөрсөн загварын шоуны тайзнаа нугадаа дураар цахилах гөрөөс адил алхах түүнийг манай дуран ийн буулгалаа. Монголын нийгэмд одоохондоо үйлдвэрлэл хомс энэ үед загварын салбарыг хөгжүүлнэ гэдэг хэцүү. Түүнийгээ дагаад мисс бүсгүйчүүд дан ганц энэ салбараар яваад хоолоо олж иднэ гэдэг үнэхээр асуудалтай.  Гэсэн хэдий ч манайд Т.Туяамаагаас эхлээд энэ салбарт үнэнч байж, салбараа хөгжүүлэхийн төлөө цахилж яваа гөрөөс нэлээд хэд байдаг нь сайшаалтай.