Эрчүүд түүн шиг эхнэртэй болохыг хүсдэг

МҮОНТ-ийн бүтээл “Хойморт өнжих нар” олон ангит МУСК-ны жүжигчин Ц.Энхтайван буюу Товуугийн гэргий Чимгээгийн дүрээр олонд танигдсан энэ бүсгүйг үзэгчид санаж байгаа биз ээ. Тус кинонд гэргий хүний хатан ухаан, тэсвэр тэвчээрийг харуулсан дүрээрээ олон залуу гэр бүлд бага ч болтугай ухаарал хайрласан юм. Эр нөхрийнхөө алдаа, оноо бүрт хамт байж, дэмжиж түшиг тулгуур болсон Чимгээгийн дүрд тоглосон энэ бүсгүй амьдрал дээрээ ч даруухан нэгэн гэнэ лээ. Орчин цагт эр нөхрийнхөө мандах цагт нь хамт байсан атлаа хазгай гишгэж хамгаа алдахад нь хаяад оддог бүсгүйчүүд олон бий. Эрчүүдийн гэргий гэдэг бол эр нөхрийнхөө охин шиг хайр энхрийлэлд нь нялхарч алдах үед нь ээж шиг нь байж зааж чиглүүлдэг гэдгийг тус киногоор энэ бүсгүй дүрээрээ үнэхээр сайн гаргаж чадсан нь одоо ч хүмүүсийн сэтгэлд тодхон байдаг биз. Ер нь амьдрал Чимгээгийн дүр шиг гэргийг эр хүн бүр хүсдэг гэхэд нэг их хилсдэхгүй болов уу.