Том Круз бэртлийнхээ тухай ярив

Холливудын царайлаг жүжигчин Том Крузын үнэнч шүтэн бишрэгчдэд нэгэн таатай мэдээг дуулгая. “Биелэгдэшгүй даалгавар” киноны зургаадугаар ангийн зураг авалтын үеэр Томын авсан бэртэл хэвлэлүүдийн мэдээллэж байсан шиг тийм ч айхтар биш гэнэ. Нэгэн үзүүлбэрийг хийх үеэрээ жүжигчин эр хөлөө хугалсан тул зураг авалтыг дор хаяж гурван сараар хойшлуулна гэж продюссерүүд нь бодож байв. Гэтэл Том биеийнхээ байдлын талаар ярихаар шийджээ. Тун удахгүй буюу хагас сарын дараа зураг авалтдаа эргэн орно гэдгээ Том Круз амлав. Тэгэхээр кино дэлгэцэнд төлөвлөсөн ёсоор ирэх оны долоодугаар сарын 27-ны өдөр гарах аж. 55 настай Том Круз адал явдалт, тулаант кинонуудад бараг бүх үзүүлбэрээ орлон тоглогчгүйгээр хийдэг билээ.