“Биений юм” уусан гэх Н.Номтойбаяр сайдад Хүн ам, нийгмийн яам ахдах бус уу

Нэгэн үе Монгол Улсын хамгийн муу хүнээр тодроод байсан Н.Номтойбаярт Монгол Улсын Хүн амын хөгжил, нийгмийн хамгааллын яамыг өгч удирдуулах нь ард түмнээ арай басамжилсан хэрэг бус уу. Хүүхэн шуухны асуудалд байнга орооцолдож, авгай хүүхдээ үргэлж зовоож явдаг Н.Номтойбаяр бусдын хүүхдийн төлөө юм хийх үү. Өөрийн хүүхдийг бодохгүй байгаа хүн бусдын хүүхдийн төлөө өр нь өвдөнө гэдэг юу л бол.

 

Тиймээс Хүн амын хөгжил, нийгмийн хамгааллын яаманд арай сэтгэлтэй, өр нимгэн хүнийг тавьж ажиллуулмаар. Сайд Н.Номтойбаярын хувьд авгай хүүхний асуудал хэрээс хэтэрсэн гэхэд болно. Ямар сайндаа Н.Номтойбаярыг булаацалдсан, өөрийн болгох гэсэн эмэгтэйчүүдийн тэмцэл түүнд биений юмаа уулгах хэмжээнд хүртэл өрнөсөн байхав дээ. Н.Номтойбаярын хувьд өмнө нь хоёр ч эхнэрийн нүүр үзэж гурав дахиар нь Б.Мандхай хэмээх сайхан бүсгүйг сонгон гэрлэж, хоёр ч охины эцэг болсон.

 

 

Харин төд удалгүй хуучин зангаа тавихгүй хүүхэн шуухантай орооцолдож, нялх биетэй эхнэрээ нулимстай нь хутгаж, хүүхдүүдээ аваад алсын АНУ-ыг зориход хүргэсэн. Н.Номтойбаяр нэг хэсэг Д.Мянганбаярын экс эхнэр, “Ард түмний мисс” Д.Ариунцэцэгтэй нэр холбогдсон ч удалгүй “Киви” хамтлагийн гишүүн П.Алтанцэцэгтэй амрагийн харилцаа үүсгэсэн. Энэ харилцаа зүгээр ч нэг харилцаа байгаагүйгэх бөгөөд Д.Мандхайн АНУ-ыг зорихоосоо өмнө хэвлэлд өгсөн ярилцлагадаа “Тэр хүүхэн /Агий / миний нөхөрт биений юмаа уулгаж өөртөө татсан байна лээ. Хамтлагийнхаа ахлагч Укагийн ээж Т.Замандаар бөөгийн зан үйл хийлгүүлсэн байна лээ” гэсэн юм.

 

 

Т.Замандын хувьд Монголын номер нэг удган гэхэд бараг хилсдэхгүй чадварлаг нэгэн бөгөөд дээдсийн хүрээнийхэн түүнийг анддаггүй.  Хамгийн гол нь, авгай хүүхний асуудалд толгойгоо мэдүүлсэн, албан өрөөндөө ажил бус авгай хүүхэн л төсөөлөөд сууж байдаг мань хүнд бусдын эхнэр, хүүхдийн төлөө сэтгэлээ зориулан ажиллах нийгэм, хүн амын хөгжлийн асуудал хариуцсан яамны ажил арай тохирохгүй бус уу.  Анхнаасаа л хүүхэн хүчинддэг, хүн зоддог, дарамталдаг гэх хэл аманд байнга өртдөг улстөрчдийн нэг Н.Номтойбаяр байсан. Зарим хүний хэлснээр бол “эрүүгийн элемент” мань нөхөр шоронгийн хаалга татах дээрээ тулаад байхдаа ордны хаалга татаж чадсан. Эрүүгийн хүнд “гэмт хэрэгтэн” 2012 оны сонгуулийн өмнө гэв гэнэт Нийгмийн хамгаалал, хөдөлмөрийн дэд сайдаар томилогдож, улстөрд нэлээд том алхмаар хөл тавихад гайхах хүмүүс олон байв.

 

Тухайн үед түүнийг Тусгаар тогтнолын ордныг барихад 1 тэрбум төгрөгийн хандив өгснийхөө шанд Сү.Батболдоос дээрх албан тушаалыг авсан гэсэн яриа ч гарч байсан. Ямартай ч, ингэж улстөрд орж ирсэн Н.Номтойбаяр 2012 онд Дорнодоос УИХ-д сонгогдож улстөрд дөрвөн жил суусных томоожсон нь түүний өмнө нь хийж байсан үйлдлүүдээс илт харагддаг. Харин хормойн  асуудал нь хэвээр үлдэж, сайд болсон ч байсаар байгаа бололтой.

 

 

Ингээд нэгэн үе түүнтэй нөхөрлөж, дараа нь дайснууд болсон “Мунзуй” хочит Г.Нямдоржийн Н.Номтойбаярын талаарх УИХ-ын Ёс зүйн дэд хороо, УИХ-ын гишүүд, УИХ-ын дарга З.Энхболдод хаягласан өргөдөлдөө бичсэн зүйлийг хүргэе.

 

Г.Нямдорж өргөдлийнхөө эхэнд УИХ-ын гишүүн Н.Номтойбаярыг авлига, хүчин, танхай зэрэг бусад олон төрлийн гэмт хэргийг үйлдсээр байхад хууль хяналтын байгууллагууд түүний хамгаалалтын алба шиг аашилж, түүнтэй сөргөлдсөн хүн бүрийг буруутган яллаж, өөнтөглөдөг боллоо хэмээгээд доорх ноцтой баримтуудыг дэлгэн бичсэн юм.

 

1. 2013 оны есдүгээр сарын 25-наас 26-нд шилжих шөнө Сүхбаатар  дүүргийн “Le Triskell” бааранд архи ууж согтсон УИХ-ын гишүүн Н.Номтойбаяр над руу хутга барин дайрч, миний найз Д.Баттулгыг хоёр удаа хутгалсан. Толгой дээр нь архины шил хагалсан энэхүү танхайн үйлдэлдээ миний биеийг буруутган гүтгэсэн. Танхайн хэргийг олон нийтэд мэдээлсэн  Сүхбаатар дүүргийн 1-р чиглэлийн ахлах мөрдөн байцаагч  Х.Мандахын цолыг бууруулахад нөлөөсөн байдаг юм. Миний найз Д.Баттулга цагдаа, прокурорт олон удаа гомдол гаргасан боловч “Хутгалсан хэмжээ хүрээгүй”  гэсэн хачин тайлбар хийн хүлээн аваагүй. Иргэн Нямдорж миний бие болон гэр бүлийн гишүүдийг маань бүх хэвлэл мэдээллээр захиалгатайгаар гутаан доромжилсон нийтлэл, нэвтрүүлэг, мэдээ цацсанд гомдолтой явдаг. Миний биеийг огт танихгүй гэж хэвлэлийн бага хурал хийлгэж байснаа төд удалгүй найз явсан гэдэг юм. УИХ-ын гишүүн худал хэлж болдог юм уу. Хууль хяналтынхан энэ хэргийн үнэн мөнийг тогтоохын оронд тоглоомын газарт ороод гарсан намайг шоронд суулган хэргийг хэрэгсэхгүй болгосон билээ.

 

2. 2012 онд “МАК” групп болон Н.Номтойбаярын талаар мэдээлэл хийсэн Б.Батзориг Франц улсад орогнож байгаа билээ. Эхнэр, гурван хүүхдийн хамт ОХУ-ын хилийг явганаар даван таван иргэн маань Н.Номтойбаяраас зугтаж явна. Түүний хийсэн мэдээллийг яагаад шалгасангүй вэ. Эх орноо санан бэтгэрэх таван иргэнээ хамгаалах, авчрах талаар Монгол Улсын Засгийн ямар нэг алхам хийж болохгүй юу. Б.Батзориг хэмээх залуугийн мэдээлэлд дурьдсан албан тушаалнууд бүгд амьд мэнд, албан тушаалаа хашаад явж байна. Би ч бас зарим хэргийнх гэрч, хохирогч шүү дээ.

 

3. “Golden dragon” ресторанийн эзэн С.Батзориг гэдэг залуугаас сая ам.долларын үнэтэй хаусыг нь авчихаад, мөнгөө өгөхөөс унжин зодсон байдаг. Энэ залуу Хан-Уул дүүргийн цагдаагийн хэлтэст гомдол гаргаад өөрөө буруудах дөхсөн. Цагдаагийнхан зодуулсан хохирогчийг УИХ-ын гишүүний нэр төрд халдахыг завдсан хэргээр айлган сүрдүүлж өргөдлийг нь буцаан татуулсан байдаг юм.

 

4. 2010 онд дуучин Дэлгэрмөрөнтэй бааранд муудалцаад, бие хамгаалагч нараараа хүчээр машиндаа суулган, Богд уулын аманд авчирч, модонд нүцгэн хүлж зодож, шөнөжин тамлаж, дэргэд нь архи ууцгааж доромжилсон.

 

5. УИХ-ын гишүүн Х.Баттулгын хүү Б.Жавхлантай муудалцан машинаасаа том хутга гаргаж ирэн ална хэмээн сүрдүүлж цавчиж дайрсан. Эрхэм гишүүн ааваас нь асуусан ч болно доо.

 

6. 2011 онд “Эрэл”-ийн Эрдэнэбатын том хүүг Сүхбаатар дүүрэгт байрлах “Viranda” бааранд найз нарынх нь хамт зодоод толгой дээр нь шээсэн. Дарамталж гомдлыг нь цагдаад өгүүлээгүй.

 

7. 2011онд Үндэсний хөрөнгө оруулалтын банкны захирал асан Батмөнхтэй Чингэлтэй дүүрэгт  байрлах “Faсe” бааранд муудалцаад, машиндаа суулган Амгалангийн гудамжинд аваачиж зодсон. Мөн “Сүнжин Гранд” зочид буудалд оруулж зодсон.

 

8. 2012 онд “RIVER SOUNDS” бааранд согтуурч, Гадаад харилцааны сайд Г.Занданшатарын зөвлөх, Ардын уран зохиолч Тангадын Галсангийн хүүг зодож танхайран, гэр рүү нь утасдаж ална гэж заналхийлсэн. Ардын уран зохиолч Т.Галсан гуай ч гэрч шүү дээ.

 

9. 2011 онд Сүхбаатар дүүрэгт байрлах “BRIX” бааранд согтуугаар танхайрч, Хан-Уул дүүргийн иргэн С.Ганбаатарыг шалтгаангүй зодон, нүүрэн тус газар нь өшиглөж, гурван  шүдийг нь унагасан. Тухайн өдрийн ТВ-9-ийн шөнийн хөтөлбөрөөр гарсан. (МАН намын залуучууд намайг зодсон гээд буруу хараад, ярилцлага өгсөн бичлэг нь бий)

 

10. 2011 онд Бүжин гэдэг эмэгтэйг гэртээ аваачин зодоод хүчиндсэн. Нүд нь хавдсан, хөмсөг нь сэтэрсэн. 500 ам.доллар өгүүлж хэргийг дарсан байдаг. Энэ эмэгтэй одоо хүртэл гомдолтой явдаг бөгөөд олны хараанд өртөхөөс айн гэмт хэргийн хохирогч болон үлдсэн билээ.

 

11. 2011 онд  Сэлэнгэ аймгийн Хүдэр суманд байрлах ангийн отгийнхоо үйлчлэгч Энхтуяаг архиар шахаж согтоон хүчиндсэн. Энэ хэргийн талаар дөрвөн гэрч бий. УИХ-ын гишүүн Н.Номтойбаяр “Мөнгийг нь төлөөд үйлчилгээ авсан” хэмээн дараа нь маш боловсон тайлбарладаг. УИХ-ын гишүүд ийм үйлчилгээ авах эрхтэй байдаг юм уу.

 

12. 2010 онд Тэрэлжид байрлах Мэлхий хад орчимд МАК-ийн эзэмшлийн газрын төлбөр төлөөгүй хугацаа хэтэрч хураагдсан байсныг залруулсан. Нийслэлийн газрын албаны хүнд 150 мянган ам.доллар өгсөн. Тухайн үед энэ  асуудлыг хэн хариуцаж, сунгаж  байв. Данс руу нь хэдэн төгрөг орж, юу авав гээд шалгахад гараад ирнэ дээ.

 

13. 2010 онд Нарийн сухайтын Төмөр зам барих ажилтай холбоотой тогтоол гаргуулахаар ТЗХЭГ-ын даргад 50 мянган ам.доллар, “Chivas-21” вискийн авлига ажлын байранд нь өгсөн.

 

14. 2011 онд ЭБЭХЯ-ны Сайд Зоригтод нөлөөлөх замаар “МАК”-д ашигтай Эрчим хүчний асуудлыг шийдвэрлэх тогтоол гаргуулаад, 600 сая төгрөг өгсөн.

 

15. 2009 онд Дорнод аймгийн Баянтүмэн сумын Засаг дарга Сумъяад тусгай хэрэгцээний газар чөлөөлүүлэхээр “МАК” группийн дэд Ерөнхийлөгч Цогтоор дамжуулан 50 сая төгрөг бэлнээр  өгч асуудлаа шийдүүлсэн. Сумъяа авсан мөнгөөрөө тэр даруй байр, машин авсныг “МАК” группын  удирдлага шүүмжилж байсан билээ.

 

16. 2010 онд Дорнод аймгийн Адуунчулууны орд газартай холбоотой 2010 оны 4 сарын 5-ны 92 тоот тогтоол гаргуулахаар давж заалдах шатны Шүүх хурлын бүрэлдэхүүнд (Захиргааны хэргийн тэнхимийн тэргүүн шүүгч О.Зандраа, шүүгч Д. Батсайхан, Ц.Сумъяа, Д.Бат-Эрдэнэ, Д.Пунцаг) нар багтаж байсан. Шүүх хурал болохоос өмнө 100 мянган ам.доллар хувааж өгсөн.

 

17. Монголын харилцаа холбооны  газрын дарга Содоод ТВ байгуулах талаар 20, 20 саяар хоёр удаа нийт 40 сая төгрөг өгсөн . Мөн 2011 онд Эрүүгийн цагдаагийн газарт 12 сая төгрөг өгсөн гэж мэдүүлсэн. Хандив уу, авлига уу гэдэг нь тодорхойгүй.

 

18. Автомашины гаалийн бичиг дээр үйлвэрлэсэн оныг сольж, үнийг бууруулж бичих замаар татварыг дутуу төлдөг. Бенц G350 300000 илүү ам.долларыг үнэтэй 2010 оны машины оныг 2009 болгож, үнийг 60000 ам.доллар болгосон.  Цэлмүүны PORSHE-ны үнэ нь 700.000 гаруй ам.доллар байтал Гаалийн бичигт 130.000 ам.доллар гэх мэт

 

19. Алтны уурхайтай байхдаа алтаа нууцаар Сингапур луу гаргаж зардаг  талаар “МАК” группийн Тамгын газрын дарга Батбаатар нь ажлаас халагдахдаа дэлгэнэ хэмээн сүрдүүлж, 5 өрөө байр, 9911-тэй дугаар, “Соната-6” машин зэргийг авч халагджээ. Энэ нөхөр сүрдүүлж авсан байрандаа, 9911… дугаартай утсаа барьсаар байгаа билээ.

 

20. 2011 онд Минжийн дархан цаазат газар хавар ичээнээсээ гарсан эм баавгайг хоёр бамбаруушийн хамт буудаж алсан. Зурагтаар Н.Номтойбаяр “Би анчин хүн л дээ. Энэ баавгай надтай зургаа даруулсан” гэсэн хачин зүйл ярьдаг. Тэр баавгайг бамбарууштай нь алж байхад хараад зогсож байсан гэрч бол миний бие.

 

21. 2005-2011 оны хооронд  компанийнхаа нисдэг тэргээр Минжийн дархан цаазат газраас буга, хандгай, баавгай, гахай гэх мэт хориотой амьтдыг алж, Сэлэнгэ аймгийн Хүдэр суманд байрлах ангийнхаа отгийг чимэглэсэн. (Зураг нь байгаа). Өлссөндөө, шунасандаа бус зугаацах гэж ан амьтан хяддаг этгээд юм.

 

22. 2010-2011 оны хооронд  ТТ маркийн гар буу хоёр ширхэг бий. (МАК-д ДХМХэлтсийн даргаар ажиллаж байсан Б-с тигр буугаар сольж авсан). Байлдааны АКА-47 Найз Б-гээсээ 1300$-оор авсан. Багануур дүүргийн цагдаагийн хэлтэст хураалгасан. Одоо авсан байлгүй. Эрхэм гишүүнийг хүн амьтан буугаар сүрдүүлсэн, зэвсэглэлийн талаар гэж зөндөө сонссон байх.

 

Нэгэн зүйл: Төрийн албаны зөвлөлөөс хуурамч дипломтой албан хаагч нарыг ажлаас нь халдаг юм билээ. Харин УИХ-ын ёсзүйн байнгын хороо ямар арга хэмжээ авдаг бол. Эрхэм гишүүн Н.Номтойбаяр 1986-1995 оны хооронд дунд сургуулиа дүүргэсэн гэж намтартаа бичсэн байдаг. Энэ бол үнэн. Тэрээр нэгдүгээр сургуулиас 45 дугаар дунд сургуульд ороод, том хүний ажил хийсэн учир хөөгдсөн юм. 17 настай хүүхэд АНУ-д аяга таваг угааж явсан түүхтэй. Дунд сургуулиа төгсөөгүй хүн дээд сургуулийн дипломтой байж болох уу. Яг үнэндээ бол дээд сургууль төгсөөгүй хүн шүү дээ.

 

Нэгэн зүйл: АНУ-ын Чикаго хотын бааранд бусадтай зодолдон, бусдыг хутгалсан хэргээр шоронд орсон. Шүүхээс гэм буруутай нь тогтоогдон ял авсан учир АНУ-д орох эрхээ хасуулсан байдаг. Иргэний бүртгэл мэдээллийн төвөөс шүүгээд үзэхэд Н.Номтбаяр, Номтойбаяр гэсэн хоёр паспорт гарч ирнэ.

 

Нэгэн зүйл: Ерөнхий сайд С.Баяр “МАК” группийг Европын сэргээн босголтын банкнаас 400 сая ам. долларын зээл авахад Засгийн газрын баталгаа гаргаж өгч байлаа. Яг үнэндээ  “Буян” Жаргалсайханд Жасрайн Засгийн газар баталгаа гаргаж өгч байсан шиг. Одоогийн Ерөнхийлөгч Ц.Элбэгдорж  Ерөнхий сайд байхдаа “Тогтвортой байдлын гэрээ”-г “Чинхуа МАК” хийж өгч байлаа. Ерөнхийлөгч асан Н.Багабанди гэр бүлийн найзууд байх жишээтэй. Б.Нямтайширын охин Цэлмүүний хурим дээр хуучин, шинэ хоёр Ерөнхийлөгч зэрэгцэж суугаад бялуу идэж байгаа зураг байдаг юм.

 

Нэгэн зүйл: Монгол Улсын 34 орд газар МАК буюу Н.Номтойбаярын мэдэлд байдаг. Түүхийн дурсгалт Хар зүрхний нуур, тусгай хамгаалалтад байдаг Шишхэдийн уул тайгыг хүртэл эзэмшилдээ авч байна. Нисдэг тэргээр барилгын материал зөөж, генерал цолтой хүн бариулж байх юм. Үнэндээ Монгол Улсын  баялаг эрхэм гишүүний зугаа цэнгэл, авлига, хууль бус үйлдлийг нуун дарагдуулахад урсаж байна. “Мөнгөтэй хүнд хууль үйлчилдэггүй” гэсэн тод жишээ бол Н.Номтойбаяр. Хууль тогтоодог байгууллагын эрхэм гишүүд үүнд хариулах биз. Миний бие дээрх хэргүүдийг хууль хүчний байгууллагаар шалгуулах хүсэлтэй байна. Мөн Н.Номтойбаярт ёсзүйн хариуцлага хүлээлгэж өгнө үү гэж бичиж байсан юм.

Төгс