Загвар өмсөгч А.Чингүүн эхнэрээсээ нууцаар болзоонд явснаа дэлгэв

“Royal” телевизийн хөтлөгч Н.Ундралтай ханилснаас хойш амьдрал нь орвонгоороо эргэж, аз жаргалдаа бялуурч яваа гэгдэх загвар өмсөгч А.Чингүүн шинэ оны өмнөхөн бяцхан гүнжээ өлгийдөж авсан билээ. Өөрийг нь өвчсөн мэт дуурайсан хөөрхөн хүүгээ дүүтэй болгоод байгаа жаргалтай аав маань загварын ертөнцөө мартаж орхиод бизнест хүч үзэх болсон.

“Хүннү” зочид буудал, фитнесс клубын захирлаар ажиллаж буй А.Чингүүний хувьд өмнө нь мисс Ч.Содтуяатай хамтран амьдарч, Ч.Содонгоо нэртэй анхны охиноо тэвэрч байсан эр. Чинээлэг эрчүүдийн нүдийг хужирласан сайхан бүсгүйтэй цуг амьдрах нь хэтэвч нимгэн модель залууд дэндүү ахадсан асуудал байсныг хожим нь хэвлэлд дурсахдаа ч тэрбээр эмээгээгүй.

Харин хоёр дахь амьдралаа зохиохдоо бийлэгжүү айлын ганц охиныг өөрийн болгосон мань эр ийнхүү гурав дахь хүүхдээ тэврээд байгаа билээ. А.Чингүүн бяцхан охиноо олны нүднээс ихэд нууцлан, хотоос зайдуухан салхилуулдаг бөгөөд саяхны нэгэн өдөр нууцаар болзоонд явсан гэнэ. Энэ тухайгаа тэрбээр “Ээж, агаа хоёрыгоо “жийгээд” нууцаар болзож байна, бид хоёр. Миний бяцхан гүнж. 2016 оны хамгийн үнэтэй “бэлэг”-тэйгээ селфи хийлээ” хэмээн хөгжилтэйгээр тайлбарлажээ.

С.Цахиур

www.zone.mn