Трамп Хятадын дургүйг хүргэв

АНУ-ын 45 дахь ерөнхийлөгчөөр сонгогдсон Дональд Трамп Цай Инг-венийг “Тайванийн ерөнхийлөгч” хэмээснийг Бээжин буруушааж байна. Дональд Трамп баасан гаригт (2016.XII.2)  Тайванийн ерөнхийлөгчтэй 10 минут утсаар ярилцсан хэмээн Твиттертээ жиргэснээс асуудал үүсчээ. Тэрбээр “Тайванийн ерөнхийлөгч над руу залгаж баяр хүргэлээ” хэмээн жиргэсэн аж.

 Хятадын гадаад хэргийн яамнаас хоёр улсын улс төрийн харилцааны үндэс нь “нэг Хятад” бодлогыг хүлээн зөвшөөрсөн явдал хэмээгээд Тайваньтай харилцахдаа болгоомжтой байхыг анхааруулжээ.

Өмнө нь 1979 онд АНУ-ын экс ерөнхийлөгч Жимми Картер Тайванийг Хятадын нэг хэсэг хэмээн хүлээн зөвшөөрснөөс хойш хоёр талын тэргүүнүүдийн хооронд утсаар ярилцсан түүх байхгүй аж.  

Дональд Трамп өнгөрсөн арваннэгдүгээр сард ерөнхийлөгчийн сонгуульд ялалт байгуулсанд Хятадын дарга Си Жинпин утсаар баяр хүргэсэн юм. Тухайн үед тэрбээр Хятадыг аугаа улс хэмээн өргөмжилж байжээ.

Эх сурвалж: Reuters