С.Жавхлан гишүүн “Эрдэнэт”-ийн асуудлаар хэлэлцүүлэг зохион байгуулахаар болжээ

УИХ-ын гишүүн С.Жавхлан мэдээлэл хийлээ. Тэрээр чуулганы нэгдсэн хуралдааны үеэр “Уулын баяжуулах “Эрдэнэт” үйлдвэртэй холбоотой эргэлзээтэй асуудал их байна. Гэвч нэр нь холбогдоод байгаа энэ хүмүүс хамтдаа Төрийн ордонд сууж байгаа хэрнээ нэг нэгнээ олж уулзаад нүүр нүүрээ хараад ярьчихаж чадахгүй юм” хэмээн байр сууриа илэрхийлсэн юм. Тэрээр үүнийхээ дагуу “Эрдэнэт” үйлдвэрийн 49 хувийн хувьчлалтай холбоотой асуудалд нэр нь холбогдсон хүмүүсийг оролцуулсан телевизийн шууд хэлэлцүүлэг зохион байгуулахаар төлөвлөжээ. Улмаар МҮОНРТ-ийн “Монголын мэдээ” сувгийн захирал Ч.Батцэнгэлд хандсан байна. Тэрээр С.Жавхлан гишүүний албан бичигт хариулт өгөхдөө “Холбогдох хүмүүст хэлэлцүүлэгт ирж оролцох санал тавьсан боловч татгалзсан хариу өгч байна” гэсэн хариу өгчээ. Үүний дараа “Монголын мэдээ” сувгийн захирал Ч.Батцэнгэлийг ажлаас нь халсныг С.Жавхлан гишүүн “Эрдэнэт” үйлдвэрийн 49 хувийн хувьчлалтай холбоотой гэж хардаж байгаа ажээ.

Хэлэлцүүлэгт Ерөнхийлөгч, УИХ-ын дарга, Ерөнхий сайд нарыг оролцох ёстой гэж үзэн урилга илгээснээ дуулгалаа. 

УИХ-ын гишүүн С.Жавхлан телевизийн хэлэлцүүлэг хийх саналаа МҮОНРТ-ийн гүйцэтгэх захирал Ц.Оюундарьд илгээсэн байна. Уг саналдаа энэ сарын 18-ны 21.00 цагт хэлэлцүүлэг зохион байгуулж өгөхийг хүсчээ. Мөн уг хэлэлцүүлэгт Ерөнхийлөгч, УИХ-ын дарга, Ерөнхий сайд нарыг оролцох ёстой гэж үзэн урилга илгээснээ дуулгалаа. Түүнчлэн Ерөнхий сайд асан Ч.Сайханбилэг болон түүний Засгийн газрын гишүүд, Монголбанкны ерөнхийлөгч асан Н.Золжаргал, “Эрдэнэт” үйлдвэрийн 49 хувийг худалдаж авсан аж ахуйн нэгжийн төлөөллийг хүрэлцэн ирж хэлэлцүүлэгт оролцохыг уриалсан байна.