Мисс Ю.Балжидмаа амжилт үзүүлсээр байна

Манай загварын салбарынхан дотооддоо төдийгүй дэлхийн хэмжээнд өрсөлдөхүйц чадвартай гэдгээ батлан харуулсаар байгаа билээ. Тэдний нэг болох “Монгол модель”  агентлагийн загвар өмсөгч, “Мисс Монголиа-2014” оны Тэргүүн мисс Ю.Балжидмаа өөрийн гэсэн өнгө төрх, орон зайгаа тодотгон тун ч амжилттай яваа.

Загвар өмсөгч бүсгүй Хятад улсын Шиньжянд 28 дахь удаагаа зохион байгуулагдсан 60 гаруй орны үзэсгэлэнт бүсгүйчүүд оролцсон Дэлхийн хэмжээний “Miss model of the world”  тэмцээнд амжилттай оролцон Топ 10-т багтан, “Miss model of the world-Miss  best media impression” шагналын эзэн болсон байна. Түүний хувьд анхны Олон улсын чанартай тэмцээнд оролцсон гэхэд чамлахааргүй амжилт үзүүлсэн бөгөөд өнгөрсөн есдүгээр сард Хонг Конгд зохион байгуулагдсан “international fashion super model” тэмцээнд хоёрдугаар байр эзлэн, “Most voted social media” шагналыг хүртжээ.

Энэхүү хоёр шагналыг хүртсэн тэрбээр “international fashion super model” хэмээх цолыг авсан байна. Гоо сайхан байдлаа эрхэмлэн, эх орныхоо нэрийг өндөрт өргөн, авьяас чадал, хөдөлмөрч зангаараа амжилт үзүүлж байгаа түүнийг цаашдаа олон олон тэмцээнүүд хүлээж байгаа биз ээ. Эх орон, элэг нэгтнүүдийнхээ нэрийг өндөрт өргөж явах хүндтэй үүргийг хүлээсэн хэн бүхэнд амжилт хүсье. 

PAPARATSI.MN