“Монголын анхны бүрэн хэмжээний 3D хүүхэлдэйн кино дэлгэцнээ”

Монголын кино урлагийн шинэхэн бүтээл болох “Жангар” бүрэн хэмжээний анхны 3D хүүхэлдэйн киног та бүхэндээ танилцуулж байна. Энэхүү бүтээлийг "FSM media group" компани, "Chimdee”s music" компани, "Jangar international" компаниуд хамтран бүтээжээ. Кинонд өөрийн эх нутаг, улс  үндэстнээ хамгаалж, анд нөхөрлөлийн чин шударга зан чанар, эрэлхэг баатрын ариун үйлсийг харуулaх бөгөөд  3D графикаар бүтээгдсэн анхны бүрэн хэмжээний хүүхэлдэйн кино гэдгээрээ онцлогтой юм байна. 

Монголын тэргүүн утга зохиолын оргилын нэг болох “Жангар” туулиас сэдэвлэн бүтээгдсэн кино нь 2016 оны дөрөвдүгээр сарын 16-нд албан ёсоор эх орондоо нээлтээ хийгээд, тун амжилттайгаар Бээжин хот болон, ОХУ-ын Буриад улсын Улаан-Үд хот, Тува, Халимагын үзэгчдийн хүртээл болжээ. Харин энэ удаад 2016 оны есдүгээр сарын 30-нд бүх кино театруудын дэлгэцнээ гарч эхлэх түүхэн, онц сонирхолтой, өв соёлоо дээдэлсэн уг уран бүтээлийг үзэгч та бүхэн бяцхан хүүхдийнхээ хамтаар гэр бүлийн гишүүдээрээ үзээрэй.