Залуучуудын холбооны 95 жилийн ой тохиож байна

Монголын залуучуудын холбоо /МЗХ/ байгуулагдсаны 95 жилийн ой өнөөдөр /2016.08.25/  тохиож байгаа бөгөөд жил бүрийн энэ өдрийг “Монголын залуучуудын өдөр” болгон тэмдэглэсээр иржээ. Үүний хүрээнд МЗХ-ноос  жанжин Сүхбаатарын хөшөөнд цэцэг өргөж хүндэтгэл үзүүлэх ёслол өнөө өглөө боллоо. Мөн МЗХ-ны үе үеийнхний түүхийг харуулсан гэрэл зургийн үзэсгэлэн болоод 95 жилийн ойн баярын хурал, шагнал гардуулах ёслолыг Драмын театрын танхимд зохион байгуулж байгаа юм.

“МЗХ-ны одоогийн төлөөлөл болон МХЗЭ-ийн үе үеийн төлөөлөгчид оролцсон “Мөнхийн залуу нас-95” галт тэрэгний аялал өнөөдөр Улаанбаатар хотоос Дархан, Сэлэнгийн чиглэлд аялна” гэж МЗХ-ны хэвлэлийн төлөөлөгч Ч.Гантуяа хэллээ. Тус байгууллагын ойд зориулж ОХУ болон БНАСАУ-ын залуучуудын холбооноос мэндчилгээ илгээсэн байсныг баярын хурлын үеэр уншиж танилцууллаа.Ойн хурлын үеэр  салбар салбартаа амжилт гаргаж, тив дэлхийд Монголоо дуурьсгаж буй шилдэг тэргүүний залууст шагнал гардуулах ёслол болсон юм. Монголын залуучуудын холбооны “Залуучуудын зүтгэлтэн” шагналаар шагнагдсан ахмад ажилтан Б.Нямбаатар “Олон жилийн тэртээ тухайн үеийн залуусын төлөөлөл болж ажиллах их итгэл надад хүлээлгэсэн. Одоо ч гэсэн надад итгэсээр байгаад баярлалаа” хэмээн сэтгэгдлээ хуваалцсан юм. 

Б.БАТ