С.Батболд: Шинээр барих автозамуудыг ус зайлуулах шугам хоолойтой байхаар төлөвлөнө

Өнгөрсөн долоо хоногт Улаанбаатар хотод хүчтэй аадар бороо, мөндөр орсны улмаас хотын төв хэсэг усанд автсан.

Тодруулбал, Баянзүрх дүүрэг бүхэлдээ, Сүхбаатар, Чингэлтэй, Баянгол дүүргийн хойд хэсэг тэр чигтээ усанд автсан. Уг нь 20 гаруй минутын ширүүн бороо, багахан хэмжээний мөндөр орсон. Гэтэл Улаанбаатар хот маань явган хүн байтугай машин явахын аргагүй болсон юм.

Хэрэв усан бороо удаан үргэлжилсэн бол Улаанбаатар хот маань тэр чигтээ үерт автаж болох байсан тул олон нийт өөрсдийн цахим хуудсаараа дамжуулан энэ асуудлыг яаралтай шийдэж өгөхийг холбогдох албан тушаалтнуудаас шаардаж байсан юм.

Тэгвэл, энэ талаар нийслэлийн Засаг дарга С.Батболд хэлэхдээ, “Цаашид ч Улаанбаатар хотод их хэмжээний бороо орох урьдчилсан мэдээ байгаа учраас нийслэлийн автозамуудын ус зайлуулах шугам хоолойг өргөтгөх, ус соруулах автомашин, техник хэрэгслийг сайржуулах шаардлагатай байна. Цаашид шинээр барих автозамуудыг заавал ус зайлуулах шугам хоолойтой байхаар төлөвлөж хийх хэрэгтэй. Тиймээс нийслэлийн Онцгой комиссын хурлыг яаралтай хуралдуулж, үерийн улмаас үүссэн нөхцөл байдлыг арилгуулах, цаашид үер усны аюулаас урьчдчилан сэргийлэх чиглэлээр ямар ажлуудыг хийх талаар  мэргэжлийн байгууллагуудын саналыг авч хэлэлцэн, хэрэгжүүлэх ажлуудаа тодорхойлно” гэжээ.