Нэрт жүжигчин Робин Уилльямс амиа алджээ

Холливудын нэрт жүжигчин Робин Уилльямс 63 насандаа Калифорн дахь хувийн эдлэндээ амиа алдсан байдалтай олдсон талаар “Yahoo.com” мэдээлжээ. Үхлийн шалтгааныг амиа хорлосон буюу хоолойгоо боосон байдалтай байсан гэсэн урьдчилсан дүгнэлтийг цагдаагийн байгууллагаас өгчээ.

Түүнийг амиа алдсан талаар даваа гаригт буюу наймдугаар сарын 11-ний орон нутгийн цагаар өглөөний 11.55 цагт жүжигчний хэвлэлийн төлөөлөгч мэдэгдсэн байна.  

Уилльямс "Good will hunting", "Mrs.Doubtfire", "Hook" зэрэг кинонуудад тоглосон дүрээрээ алдаршсан бөгөөд 1997 онд Оскарын шилдэг туслах дүрийн шагналыг хүртэж байжээ. Мөн тэрээр Эмми болон Алтан бөмбөрцгийн эзэн болж байсан. 

Жүжигчин Робин Уилльямс сүүлийн жилүүдэд санхүүгийн хямралд ороод байсан бөгөөд тэрээр хоёр ч удаа гэрлэлтээ цуцлуулсан.