”Mixx” эргэн ирлээ

25-р суваг телевизээс зохион байгуулдаг “Making The Band” шоу нэвтрүүлгээс төрөн гарсан гурав дахь хамтлаг бол “Mixx”. Тэд урлагын ертөнцөд өвөрмөц өнгө төрх, шинэ уран бүтээлүүдээрээ хурдан хугацаанд олны танил болж, дуунууд нь гарсан даруйдаа хит болж залуучуудыг байлдан дагуулж  чадсан. Гэвч тэд төд удалгүй өрх тусгаарлаж Г.Энх-амар, О.Гүнчин-иш, Б.Болдбаатар, Г.Амаржил нар хамтлагаасаа гарсан. Тэд  ”Making The Band” төслийн хугацаанд продьюсероор нь ажиллаж байсан Г.Цэрэн, Г.Баярбилэг нарын “Royal Music Production” -д харъялагдан  “The One” нэрээр шинэ хамтлаг байгуулж шинэ уран бүтээлээ ч үзэгчдэд хүргээд амжсан билээ. Харин “Mixx” хамтлагтаа үлдсэн  Б.Төгсжаргал, Т.Гүльназ нар шинэ гишүүн нэмж аван уран бүтээлээ үргэлжлүүлэх бодолтой байгаа талаараа ярьж байсан. Тэгсэн хэдий ч хамтлагийн залуус тус тусдаа уран бүтээлээ хийгээд удаагүй байсан ч дахин нэгдэж "Тагнуулч аав" киноны дууг дуулан эргэн ирлээ.