Насны ханиараа Бөмбөрчин залууг сонгосон дуучин Солонго

Дуунд дуртай бидний монголчуудыг орой бүр гадаад дуугаар хөглөж чадсан “Universe best song” анхдугаар фэстивалын авъяаслаг оролцогчдын нэг Б.Солонго өөрөөсөө өөр хүнд үл тохирох өвөрмөц стиль имижээрээ өнөөгийн залуусаас аргагүй л нэг ялгардаг. Нүдээ эргэлдүүлэн, хэл амаа зажлаж, камерын өмнө гар хуруугаараа оролдох нь цаанаа л нэг эгдүүтэй бас донжтой энэ бүсгүй 7 жилийн өмнө “Оддын эрэлд” уралдаант нэвтрүүлэгт оролцож түрүүлэх хэмжээний өрсөлдөөн үзүүлж байсныг уншигч та санаж байгаа нь лавтай. Саяхан түүний гол дүрд нь тоглосон “Зүрхэнд гэрэлтэх од” мюзикл нээлтээ хийн, гадуур л нэг Б.Солонгоогийн сайхан дуулсан, сайн тоглосныг гайхаж, магтсан хүмүүс байна билээ. Өнгөрсөн жил РТДС-ын найруулагчийн ангийг төгссөн тэрээр “A sound” хамтлагийн бөмбөрчин залуутай ханилан, үрийн зулай үнэрлэсэн гэдэг мэдээ олон эрсийн зүрхэнд шар ус хуруулах биз. Ямартай ч урлагийн гэр бүлд өвөрмөц өнгө төрх бүхий авъяаслаг залуу хос гал голомтоо асаасан нь сайхан хэрэг шүү.