Драмын авьяаслаг халаа

“Manhunt International-2010” олон улсын тэмцээнд эх орноо төлөөлөн оролцож, орон орны сайхан залуустай мөр зэрэгцэн алхаж явсан Г.Дөлгөөн-Аюуш авьяас чадвараараа шалгарч байсан. Монгол залуусын нүүр царайгаар тодорч, мэдлэг боловсролоо сориод ирсэн тэрбээр СУИС-ийн кино-драмын ангийг төгсөөд өдгөө УДЭТ-д мэргэжлээрээ ажиллаж буй. МҮОНТ-ийн “Амьдрал чиний төлөө” олон ангит киноны гол дүрд тоглосон Г.Дөлгөөн-Аюуш жүжиглэхийн хажуугаар рок попын ертөнцөд ч хүч сорихоор зэхэж яваа. Урлагийн сургуулиас нэгдсэн авьяаслаг залуус “Movie” нэртэй хамтлаг байгуулсан бөгөөд урын сандаа ч чамлахааргүй хэдэн дуутай болсон гэнэ. Драмын театр ороод удаагүй ч жүжигчин залуу ур чадварынхаа хувьд нэлээд үнэлэгддэг нэгэн гэсэндээ Ф.Шиллерийн “Хар санаа, хайр сэтгэл” жүжгийн гол дүрийг бүтээхээр болсон аж. Ийнхүү авьяаслаг залуу жүжигчинг бидний дуранд өртлөө.