Гаалийн 36 байцаагчийг яллагдагчаар татан, ажлыг нь түдгэлзүүлэн шалгаж байна

АТГ-ын ажлын хэсгийнхэн өнгөрсөн сарын сүүлчээр Замын-Үүд дэх Гаалийн газарт нэгжлэг хийж, хэд хэдэн хүнийг яллагдагчаар татан шалгаж эхэлсэн билээ. Энэ хүрээнд Гаалийн ерөнхий газар, Улаанбаатар хотын, Замын-Үүд дэх Гаалийн газрын албан тушаалтнууд нийлсэн 36 хүнийг яллагдагчаар татан, ажлыг нь түдгэлзүүлэн мөрдөн шалгах ажиллагаа үргэлжлүүлж байна.

Замын-Үүд дэх Гаалийн газрын гаалийн улсын байцаагч Д.Тэмүүлэн, гаалийн зуучлагч гэх С.Аюурзана зэрэг хүн хээл хахууль өгч, авч байх үедээ үйлдэл дээрээ баригдсан. Мөн Улаанбаатар хотын Гаалийн газрын гаалийн улсын байцаагч Д.Ням-Осор олон улсын тээвэр зуучийн үйл ажиллагаа эрхэлдэг “Марин нью пост” (МНпост) ХХК-ийн захирлаас 50 сая төгрөг хахуульд авч байхдаа үйлдэл дээрээ саатуулагдсан.

Энэ хүмүүстэй холбоотойгоор Гаалийн ерөнхий газрын эрх бүхий албан тушаалтныг ч АТГ-ын Мөрдөн шалгах хэлтсээс байгуулсан ажлын хэсгийнхэн нарийвчлан шалгаад, гаалийн байгууллага дахь авлигын шинэ сүлжээ, бүлэглэл бий болсныг тогтоогоод буй аж.