ХӨСҮТ: Улаанбурхан өвчний батлагдсан тохиолдол 8 нэмэгджээ

Улаанбурхан өвчний батлагдсан тохиолдол улсын хэмжээнд 15055 хүрээд байгаа бөгөөд нийслэлд 12061, орон нутагт 2989 бүртгэгдсэн байна. Харин нас баралт 20 болжээ.  

Халдварт өвчин судлалын үндэсний төвөөс гаргасан 2026 оны тавдугаар  сарын 16-ны мэдээллээр Улаанбурхан өвчний батлагдсан тохиолдол 8 нэмэгджээ. Одоогийн байдлаар эмнэлэгт 85 хүн хэвтэн эмчлүүлж байгаа. Гэрийн хяналтад 21 хүн байна.

Тухайлбал, нийслэлд 52 хүн, хөдөө орон нутагт 33 хүн хэвтэн эмчлүүлж байгаа аж. Насны бүлгээр өвчлөл хамгийн өндөр байгаа нь 10-14 насны хүүхдүүд бөгөөд тэдний өвчлөл 5343 хүрсэн байна. Мөн 0-4 насны 3797, 5-9 насны 1949 хүүхэд, 15-19 насны 1822 хүүхэд Улаанбурханаар өвджээ. Харин 20-24 насны 441, 25-29 насны 572 хүн өвдсөн байна.

Улаанбурхан өвчин нь халдварлалт өндөртэй ч вакцинаар сэргийлэгдэх боломжтой халдварт өвчин юм. Улаанбурхан өвчний эсрэг вакцинд хамрагдсан тухай мэдээллээ өрх, сумын эрүүл мэндийн төвдөө очин цахим бүртгэлийн программд бүртгүүлээрэй.

Хэрвээ Улаанбурханы эсрэг вакцинд хамрагдаагүй хоцорсон бол хамрагдан өөрийгөө болон бусдыг Улаанбурхан өвчнөөс хамгаалаарай.