Дуучин Э.Чулуунчимэгийнхээр хайр ийм өнгөтэй

Монголын хамгийн олон эрэгтэй партнертай, монгол орноо хамгийн олон удаа тойрон тоглосон, хамгийн олон хит дуутай, хамгийн олон тоглолт хийсэн гэхчлэн олон түүхэн рекордыг Э.Чулуунчимэг эзэмшдэг. Бас мөнхийн сенсааци дуулианы эзэн. Түүний МУГЖ Ч.Амаржаргалын “Хайрын өнгө” дууг Б.Гүрбадамтай хамтран дуулсан нь ихэд сэтгэл хөдлөм болж. Э.Чулуунчимэг тоглолт бүр дээрээ дээд үеийн уран бүтээлчидтэйгээ ёслол төгөлдөр хамтран дуулж тоглолтондоо урьж оролцуулдаг. Үе тэнгийнхэнтэйгээ хамтарсан уран бүтээл тоймгүй олон. Ямар ч дуучинтай зохицол нийцэлтэй уран бүтээлийн төлөө хувийн эгогоо дардаг нь түүний урлагт хайртай сэтгэл гэлтэй. Тийм ч учраас ард түмэн түүнд хайртай байдаг. Дуучид тоглолтоо хийхдээ яг үнэндээ өрөвдүүлэх тактик дээр хохирогчийн дүрд орж байж тасалбараа чадан ядан зарах нь энэ жилээс шинэ үзэгдэл болов. Э.Чулуунчимэг яг дүрмийн дагуу шинэ уран бүтээл шинэ хамтрал цоо шинэ бүхнээр дүүргэн тоглолтоо өмнөх жилээсээ давуулж тавьдаг. Бүтээлч хөдөлмөрч биш бол угаасаа үзэгчид мөнгөө төлөн барин хуучин дуу явцгүй тоглолт үзэхийг хүсэхгүй гэдгийг л урлагийнхан ойлгомоор. Урлаг өөрөө ихэмсэг байдал үнэ цэн юмаа. Э.Чулуунчимэг зохистой урлагийн хүний зэрэг зиндаа ноён нурууг хадгалан уран бүтээлчийн амьдралаар амьдарч байна. Хүндлэхгүй байхын аргагүй ээ. Түүний Б.Гүрбадамтайгаа хамтарсан аялан тоглолт хөдөө орон нутгаар битүү үзэгчтэй боллоо. Тэд Улаанбаатар хотод тавдугаар сарын 5, 6-нд тоглоно.

Нуруу туруу хоолойны цараа намба төрхөөрөө Б.Гүрбадам яг л ард түмний хүсэмжит Юндэн Гөөгөө шиг залуу юм. Э.Чулуунчимэг угаас Нансалмаа.

Нийтийн дууны урлагт тэд хүч түрэн цоо шинэ өнгө аясаар гарч ирэн дархлагдлаа.