Авлигын эсрэг сургалтад 2861 албан тушаалтныг хамруулжээ

Авлигатай тэмцэх газрын Урьдчилан сэргийлэх, соён гэгээрүүлэх хэлтэс нь 2025 оны 11 дүгээр сарын 10-14-ний өдрүүдэд авлигын эрсдэлийг бууруулах, шалтгаан нөхцөлийг арилгах чиглэлээр “Чингис хаан” олон улсын нисэх буудал дахь Гаалийн газар, Дулааны IV цахилгаан станц, Монголын Хүүхдийн ордон зэрэг байгууллагад ажиллаж, Нийгмийн халамжийн сан болон Хөдөлмөр эрхлэлтийг дэмжих санд хийсэн эрсдэлийн үнэлгээ, Эрдэс баялгийн мэргэжлийн зөвлөлийн үйл ажиллагаа, дүрэм, УДЭТ-ын барилгын их засварын ажилтай холбогдох асуудлаар Зөвлөмж хүргүүлэв.

Төрийн үйлчилгээнд хүнд суртал, чирэгдэл үүсэж болзошгүй эрсдэлийг тогтоох, авлига, ашиг сонирхлын зөрчлөөс урьдчилан сэргийлэх, ил тод байдлыг хангуулах, авлига ашиг сонирхлын зөрчил, хүнд суртал, чирэгдэл учруулсан дүрэм, журам, шийдвэрийг хянах ажлын хүрээнд “Гаалийн лабораторийн дүрэм”, “Багануур зүүн өмнөд бүсийн цахилгаан түгээх сүлжээ” ТӨХК-ийн ёс зүйн дүрэм, ёс зүйн зөвлөлийн ажиллах журам” зэрэг шийдвэрийг хянаж, санал хүргүүлэв.

Төрийн байгууллагын хүнд суртал, чирэгдэл, төрийн албан хаагчийн ёс зүйн асуудлаар иргэн, аж ахуйн нэгж, байгууллагаас ирүүлсэн 11 гомдол, мэдээллийг хянан шалгаж, авлигын эсрэг сургалтад нийт 2861 албан тушаалтныг хамрууллаа.