Д.Амарбаясгалан дарга аа, албан тушаалын төлөө булайгаа дэлгэлцэж буй Л.Наранбаатар, Б.Цэнгэл нараа ШҮҮРД

Засгийн газраас эхлүүлсэн шүүр ажиллагааны хүрээнд албан тушаалтнууд гэдсэндээ хөлөө жийлцэнэ гэдэг болж, булайгаа дэлгэлцэж байна.

Тодруулбал, ТӨБЗГ-ын дарга Б.Цэнгэл, “Цемент шохой” компанийн гүйцэтгэх захирал Л.Наранбаатар нар.
Аудитын байгууллагаас муу үнэлгээ авсан Хөтөлийн “Цемент шохой” үйлдвэрийн захирал Л.Наранбаатарын асуудлыг ТӨБЗГ-ын дарга Б.Цэнгэл архи ууж, ажлаа хийдэггүй хэмээн мэдэгдсэн.
Түүнчлэн тус үйлдвэрийн ТУЗ нь ч Л.Наранбаатарыг чөлөөлөхийг шаардан жагсаж, сүрийг үзүүлсэн нь саяхан.
Гэтэл тухайн асуудлыг газар нь дээр нь очиж үзсэн ТӨБЗГ-ын дарга Б.Цэнгэл шийдвэрээ 180 градус эргүүлж, зөрүүтэй мэдээлэл байна гээд ТУЗ-ийг чөлөөлж, Л.Наранбаатарыг ажилд нь “тогтоосон”.
Гэвч энэ нь нэг талдаа Л.Наранбаатар Б.Цэнгэлийн сул талыг атгаж байсан учраас ТУЗ-дөө бурууг тохож, мань захирлыг үлдээсэн үү гэх хардлагыг дагуулж байна.
Учир нь Л.Наранбаатар Б.Цэнгэл даргын захиасны буюу багын найз Г.Ганбаяр, нутгийн дүү А.Галбаатар, Б.Алтанцэцэг нарыг шахаагаар ажилд оруулсан гэдгээ хэвлэлийнхэнд ярьжээ.
Тэдний энэ хэрүүл, маргаан албан тушаалын төлөөх дажингийн дунд Л.Наранбаатарын үйлдсэн ажлын байран дахь бэлгийн дарамтын асуудал чимээгүй дарагдан өнгөрөх нь бололтой.

Тодруулбал тус үйлдвэрийн ажилтан эмэгтэй Г тушаалаа зуруулахаар захирлынхаа өрөөнд ороход түүнийг тэвэрч, түүнтэй яриа нийлж байгаа гэх зэргээр зүй бусаар харьцжээ. Ажилтны хувьд тухайн үед хэн нэгэнд хэлж чадахгүй өнгөрсөн бөгөөд энэ удаа тус үйлдвэрийн асуудал хөндөгдөж, Л.Наранбаатар өөр нэг удирдах ажилтан А-д бэлгийн дарамт үзүүлсэн гэх мэдээлэл ил гарсан үед ийн мэдэгдэж байгаа аж.

Л.Наранбаатарын энэ үйлдэл нь Хөдөлмөрийн тухай хуулийг зөрчиж, эмэгтэйчүүдийн хөдөлмөрлөх эрхэд ноцтойгоор халдаж буй үйлдэл. Гэтэл үүнийг ТӨБЗГ-ын удирдлагууд ч анзаарч тоосонгүй. Ердөө л хэн хэн нь өөрсдийн албан тушаалдаа шигдэж үлдэхийн тулд чимээгүй орхичихлоо.
Нэгэнт Засгийн газар төрийн албыг цэвэрлэх гэж байгаа бол ямар ч хуулийг хэрэгжүүлж чаддаггүй, ёс зүйн хэм хэмжээгүй удирдлагуудаасаа салж, ШҮҮР ажиллагаанд хамруулах шаардлагатай биз ээ.