“Оймс” гэх Л.Наранбаатарын овилгогүй зан “Цемент шохой”-г дампууруулаа

“Цемент шохой”-н үйлдвэрийн гүйцэтгэх захирал Л.Наранбаатар татвар төлөгчдийн мөнгөөр хэрхэн тансаглаж, үргүй зардал гаргаж байсныг нь Аудитын байгууллагаас баталсан.

Энэ нь олон нийтэд ил болмогц мань хүн өнөөдөр буюу дөрөвдүгээр сарын 10-нд цаг үеийн асуудлаар мэдээлэл хийнэ гэх зар түгээжээ. Өөрийгөө энхийн цагаан тагтаа гэж ярих нь л дээ. Гэтэл түүний булай, булхай нь ил болсоор байгааг бид хүргэе.
Тухайлбал, Л.Наранбаатар өнгөрсөн сард л гэхэд 17 сая төгрөгөөр үйл ажиллагаагаа сурталчлахаар төлөвлөөд байгаа аж. Үүнд нь, МҮОНРТ-д 7 сая, хоёр сонинд 4 сая, нэр бүхий 6 сайтад 5 сая төгрөг гэхчлэн төсөвлөжээ.

Үнэндээ хийсэн ажлаа ингэж сурталчиллаа гээд үрсэн хөрөнгө, Төрийн хэмнэлтийн тухай хууль зөрчсөн асуудлыг нь дарж, хаацайлна гэсэн үг биш.
Аудитын байгууллагын шалгалтаар Л.Наранбаатар “Цемент шохой”-н үйлдвэрийг мөнгөний саалийн үнээ болгон ашиглаж байна гэх хардлагыг баталж байгаа юм.
Тодруулбал, өмнө нь “Эрдэнэт үйлдвэр”-т их хэмжээний бэлгэвч шахсан түүх байдаг. Гэтэл энэ удаа Л.Наранбаатарыг Аудитын байгууллагаас “Бараа материалын дансанд тайлант оны 4-12 сарын хугацаанд яаралтай ашиглагдахгүй 816.9 сая төгрөгийн бараа материалын худалдан авалт хий зарцуулагдаагүй их хэмжээний үлдэгдэл байна.” гэжээ.
Гэхдээ энэ бол үнэндээ юу ч биш. Жишээлбэл, тус компанид бүртгэлтэй 546., сая төгрөгийн өртөгтэй борлуулахаар төлөвлөсөн ККС-110 маркийн байшин кран нь алга болчхож.

Худалдан авалтын төлөвлөгөөнд батлуулаагүй, нээлттэй тендер шалгаруулах босго давсан 2,187.9 төгрөгийн 11 гэрээ, харьцуулалтын аргын босго 645.7 сая төгрөгийн 16 гэрээг шууд худалдан авалт хийсэн байна. Дээд газрын шийдвэргүйгээр 300 сая төгрөгийн худалдан авалт хийж, 262.3 сая төгрөгийн шууд худалдан авалт хийсэн.

Зөвхөн нээлттэй шалгаруулалттай холбоотой 7 тэрбум 6 сая 578 мянган төгрөгийн зөрчил байгаа нь Л.Наранбаатар “Цемент шохой”-н үйлдвэрийг хувийн хэвшлээ булааж аваад дампуурлын зам руу нь хөтөлж байгааг харуулж байна.