Поп дива Б.Сарантуяа өнгө ялгарч явна

Зууны манлай дуучин, МУГЖ, поп дива гэх мэтчилэн олон гуншинтай урлагт гуч гаруй жил зүтгэсэн Б.Сарантуяаг нэрлэхгүйгээр монголын рок, поп урлагийн хөгжлийг өгүүлж үл болох биз ээ. Одоо хэр нь олон сайхан дуу гаргаж Монгол түмнээ уяруулсаар яваа Б.Сарантуяа амьдралын маш идэвхтэй нэгэн. Өнгөрсөн хавар өөрийнхөө амьдралаар ном бүтээж фэнүүдийнхээ гарт хүргээд амжсан. Зав чөлөөгөөр орон нутгуудаар явж тоглолт байнга хийх бөгөөд тэр бүрдээ ард нь ажиллах олон залуусыг харамгүй цалинжуулж, ажил амьдралыг нь залгуулдаг гэх юм билээ. Тэрээр саяханы нэгэн өдөр манай дуранд ихэд сонирхолтой гэмээр зураглалтай буулаа. Өвөл айсуй энэ цагт дуучин авхай маань зуныг санагдуулам ногоо ургаж буй дүрслэлтэй ногоон өнгийн пальтогоор гангарчээ. Хамгийн сонирхолтой нь тухайн үед түүний эргэн тойронд дан хар бараан өнгийн хувцастай хүмүүс байх нь гавьяат Б.Сарантуяаг улам  өнгө тодруулж өгөх ажээ.