Лууван Гиннесийн амжилтын номонд багтав

Америкийн ногоочин Кристофер Кваллийн төрөлх Миннесота муж дахь эдлэндээ ургуулсан лууван дэлхийн хамгийн томд тооцогдон Гиннесийн амжилтын номонд бичигджээ. Кристоферын ургуулсан лууван 10,18 кг жинтэй бөгөөд энэ нь өмнөх дээд амжилтын эзнээс нэг килограмм, зургаан граммаар илүү жинтэй гэсэн үг юм. Квалли өөрийн амжилтыг “Газраа сайн арчил, үрээ сайн бэлд, цаг агаар ч сайн байсан, жаахан аз гийлээ” хэмээн тайлбарлажээ. Тэрбээр үлэмж хэмжээтэй луувангаа идэхгүй байхаар шийдэж, буцаагаад газар булчихжээ. Харин түүний хадам эх луувангаас нь хазаад амжсан аж.