“Атганд үлдсэн эрдэнэ”-ээс эссэ бичлэгийн шилдгийг шалгаруулна

Монголын кино урлагийн ертөнцөд жинхэнэ утгаараа цахиур хагалж яваа “Хувьсал” продакшныхан өнгөрөгч гуравдугаар сарын 05-нд “Атганд үлдсэн эрдэнэ” киноныхоо нээлтийг хийж, үзэгч түмэндээ дэлгэцийн дөрөв дэх уран бүтээлээ өргөн барьсан билээ. Монгол ахуй соёл, өв уламжлалаа мартах дөхсөн “алдааг” нь орчин цагийн залууст сануулахын ялдамд амьдралын үй түмэн нугачаанд нуугдсан томоохон сэдвийг олонд дэлгэсэн энэхүү кино нээлтээ хийсэн цагаасаа хойш үзэгчдийн дунд эрэлт ихтэй байгаа нь үнэн. Өнгөрсөн сар гаруйн хугацаанд нийслэл төдийгүй Дархан, Эрдэнэт, Сүхбаатар аймгийн үзэгчдийг байлдан дагуулсан “Атганд үлдсэн эрдэнэ” киноны эргэн тойронд олон сонирхолтой үйл явдал болж буй.

Тус киног үзээд амьдралд нь сургамж болохуйц олон зүйлийг ухаарч ойлгосон гэдгээ үзэгч фэнүүд нь илэрхийлж, энэ тухайгаа бичсэн сонирхол татам сэтгэгдлүүдээ тасралтгүй илгээсээр байсан тул “Хувьсал”-ынхан нэгийг сэдэж, гайхалтай эссэ бичлэгийн уралдаан зарласан аж. “Атганд үлдсэн эрдэнэ буюу амьдралд өгсөн сургамж” сэдэвт энэхүү эссэ бичлэгийн уралдаанд идэвхтэй оролцож буй үзэгчид өөрсдийн сэтгэл зүрхэнд буусан сонирхолтой төсөөлөл, өнгөрсөн амьдралынх нь алдаа оноог сануулсан гайхалтай дурсамж, инээд эгдүү хүргэсэн элдэвтэй зураглал зэргийг нүдэнд харагдтал бичиж, тэдний цахим хаяг руу илгээсээр байгаа аж.

Тэгвэл энэхүү уралдааны шалгаруулалт тун удахгүй болох бөгөөд “Хувьсал” продакшны уран бүтээлчид өөрсдийн зүгээс шилдгийн шилдэг оролцогчийг тодруулах бол, дэд байрын шагналын эзнийг үзэгч фэнүүдийнхээ шалгаруулалтаар тодруулах гэнэ. Азтай, одтой басхүү авьяастай үзэгчийн бичсэн шилдэг эссэ бичлэг чухам аль нь байх бол оо... Дашрамд дуулгахад, өнөөг хэр нь үзэгчдийн алга ташилтаар мялаалгаж буй “Атганд үлдсэн эрдэнэ” киногоо эрхэм уран бүтээлчид маань Замын Үүд, Сайншанд, Чойрт гаргахаар зэхэж буй гэнэ шүү. 

PHOTONEWS.MN