Өмнөд Солонгос улсад хүчтэй газар хөдлөлт боллоо

БНСУ-ын зүүн өмнөд хэсгийн нутгуудад өнгөрсөн шөнө хүчтэй газар хөдлөлт болжээ. Тодруулбал, тус улсын Улсан, Кёнжү, Бучеон, Дэгү, Гённам гэх мэт хотуудад 19:45-19:58 цагийн хооронд 4.3-5.3 магнитудын хүчтэй газарт хөдлөлт боллоо гэж Өмнөд Солонгосын Цаг уурын агентлагаас мэдээллээ. Газар хөдлөлтийн улмаас  наад зах нь зургаан хүн гэмтэж бэртсэн гэх албаны мэдээлэл гарсан бөгөөд Цаг уурын агентлагийн албаны хүмүүс сэтгүүлчдэд мэдэгдэл хийхдээ “Хоёр дахь нь 1978 оноос газар хөдлөлтийн тухай мэдээ мэдээллийг бүртгэж, ажиглалт хийж эхэлснээс хойш манай улсын түүхэнд болсон хамгийн хүчтэй газар хөдлөлт юм. Мөн газар хөдлөлт дахин мэдрэгдэж болзошгүй” гэжээ.

Тус улсын Олон нийтийн аюулгүй байдал ба улсыг аюулаас хамгаалах яамны мэдэгдсэнээр, газар хөдлөлтийн улмаас эд материалын хохирол учирсан гэх 100 орчим мэдээлэл бүртгэгдээд байна. Тухайлбал, ус дамжуулах хоолой гэмтсэн, орон сууцны тааз хэсэгчлэн эвдэрч нурсан гэсэн мэдээлэл бүртгэгджээ. Зарим хэвлэлд тус улсын Кёнжу хот дахь “Волсонг” атомын цахилгаан станцын үйл ажиллагаа доголдсон гэх мэдээлэл гарсан ба урьдчилан сэргийлэх үүднээс тус атомын цахилгаан станцын бүх реакторыг хэсэг хугацаанд ажиллуулахгүй гэж албаны хүмүүс мэдэгджээ.