Тавантолгойн орд нэгэнт хятадуудын гарт оржээ

Коксжих болон эрчим хүчний нүүрсний нөөцөөрөө дэлхийд хоёрт ордог Тавантолгой эцэстээ хэний гарт орсон бэ. Энэ талаар толгой эргүүлсэн олон баримт явж байгаа ч энэхүү орд газрын өрсөлдөөнд эцсийн эцэст хятадууд ялалт байгуулсан нь тодорхой боллоо. Тус орд нь баруун Цанх, зүүн Цанх гэсэн хоёр хэсэгтэй.

Тэгвэл “Эрдэнэс Тавантолгой” компани Хятадын “Chalco”-той (“Cinalco”-гийн охин компани) 250 сая ам.долларын гэрээ хийж, зүүн Цанхийн нүүрсийг урагш зөөж эхлээд байгаа билээ. Энэ хэсэгт захиалгаар олборлолт явуулахын тулд БНЭУ-ын “Mesco Steel”, ХБНГУ-ын “BBM Operta”, Австралийн “Macmahon” гэсэн гурван компани өрсөлдсөн. Гэтэл Монголын зүгээс энэхүү сонгон шалгаруулалтын дүнг мөн л зарлаагүйгээр барамгүй өөрсдөө нүүрсээ олборлоод, Хятад руу зөөж эхэлснийг юу гэж ойлгох вэ.

Яг ийм нөхцөл байдал баруун Цанхийн ордод ч давтагдаад байна. Олон улсын сонгон шалгаруулалтын хоёрдугаар шатанд тунаж үлдсэн зургаан компани, консорциумын нэг нь ч ялсангүй. Харин Хятадын “Shenhua Energy”, Америкийн “Peabody Energy”, Орос-Монголын хамтарсан консорциумын хуваан эзэмших нэгэн компани гараанаас гараагүй ч барианд ороод ирлээ. “Chalco”, “TTJVCO”, “SGS”, “Winsaway” гэсэн эдгээр компаниудын толгой нь үнэндээ нэг юм байна.

Энэ талаар нэгэн жиргээч “Гаднаас нь харахад тус тусдаа олон аж ахуйн нэгж. Үнэндээ “China Inc” гэж нэг л компани шүү дээ. Хятадууд Тавантолгойд тугаа мандуулчихлаа” гэжээ. Харин уул уурхайн эдийн засагч гэгдэх Л.Наранбаатар “Хятадууд урт хугацаанд уран тогложээ. Хятадуудад Тавантолгойг өгөх гэлээ гэсэн нөгөө үндэсний баатрууд одоо дуугараач ээ!!!” хэмээн мэдэгдсэн байна.  

                                                                                          Д.Ирээдүй

                                                              Эх сурвалж: breakingnews.mn