Солонгост монгол залуу найз бүсгүйгээ зодсон хэргээр саатуулагджээ

Өмнөд Солонгос улсын Кимхэ цагдаагийн газар тус хотод ажиллаж, амьдардаг Монгол улсын иргэн, эрэгтэй А-г саатуулжээ. Тэрээр өнгөрсөн Даваа гаригт өмнө нь үерхэж байсан нутаг нэгт найз бүсгүй Б-г "Хэлэх чухал юм байна" хэмээн гэрээс нь дуудаж уулзсан байна. Тэд хамтдаа нэгэн зоогийн газраар үйлчлүүлэн согтууруулах ундаа хэрэглэсэн ба уулзалт дуусах үед А нь Б-д хандаж "Гэрт очоод хоол хийгээд өгөөч" гэж хүсчээ.

Хүсэлтийг нь зөвшөөрөөгүй тул А гар утсыг нь булаан аваад зогсохгүй Б-г үснээс нь зулгаан газар унагаж, толгойг нь дэвсэж зодсоны дараа хэргийн газраас зугтсан байна. Цагдаагийн ажилтнууд танхайн хэрэг үйлдээд хэргийн газраас зугтсан монгол залууг үйлдвэрийнхээ агуулахад нуугдаж байхад нь олж илрүүлжээ. Түүний үйлдсэн гэмт хэргийг үргэлжлүүлэн шалгаж буй юм байна.