Р.Пүрэвдагва арслангийн цолны мялаалгын наадам дуутай хууртай, найр наадамтай өргөн дэлгэр болж өнгөрлөө

Тулгар төрийн 2225, Их Монгол Улсын 810, Ардын хувьсгалын 95 жилийн ой, үндэсний их баяр наадмын хүчит бөхийн барилдаанд Архангайн хүчтэнүүд эр бяраараа илүүрхэн аварга, арслан харцага, начнууд төрсөн сайхан наадам болж өнгөрсөн билээ.

Тэгвэл наймдугаар сарын 11 нд Архангай аймгийн Булган суманд Р.Пүрэвдагва арслангийн цолны мялаалгын наадам нижгэр болж өнгөрсөн талаарх мэдээллийг манай сайт мэдээллэсэн. Шинэхэн арслан мялаалгын наадамдаа зориулан ногоон өнгийн дээлээр гоёсон бөгөөд хайртай гэр бүлийнхэн, ангийн нөхөд, нутаг усныхантайгаа арслан цолныхоо мялаалгын наадмыг өргөн дэлгэр сайхан тэмдэглэсэн юм.  

Цолны мялаалгын наадамд хүчит 128 бөх зодоглосноос гадна их нас, соёолон, шүдлэн морьдын уралдааныг зохион байгуулан дэнж хотойтол нутаг усныхантайгаа сайхан наадлаа.  Дашрамд дуулгахад “Алтан Дорнод Монгол” группээс арслан Р.Пүрэвдагвад AGNISTA  хотхонд 3-н өрөө байр бэлэглэсэн бөгөөд аварга болохын ерөөл дэвшүүлэн улам их амжилттай барилдахыг хүссэн юм. Ирэх жилийн наадмаар Арын сайхан хангай нутгаас  дахин аварга төрөх болтугай гэх бэлэгтэй сайхан ерөөлийг ирсэн зочид болгон хэлж байлаа. 

Э.Нашка