Н.Энхбаяр өмгөөлөгчтэй боллоо

МАН-ын дарга Н.Энхбаярыг Авлигатай тэмцэх газраас эрүүгийн хэрэгт холбогдуулан шалгаж, удаа дараа зарлан дуудсан боловч тэрээр өмгөөлөгч олдохгүй байгаа гэсэн шалтгаанаар тус газарт очиж тайлбар мэдүүлэг өгөхгүй байгаа аж. Тиймээс Авлигатай тэмцэх газраас Эрүүгийн байцаан шийтгэх хуулийн 40 дүгээр зүйлийн 40.1.5, 40.2-т заасан үндэслэлээр Монголын хуульчдын холбоонд хандаж, иргэн Н.Энхбаярт өмгөөлөгч томилж өгөхийг хүссэн албан бичиг илгээгээд байсан юм.

Өнөөдөр хуульчдын холбооноос уг албан бичгийн хариуг ирүүлсэн бөгөөд иргэн Н.Энхбаярын өмгөөлөгчөөр ажиллах хүсэлтэй нэр бүхий дөрвөн өмгөөллийн нөхөрлөл, өмгөөлөгч бий гэжээ. Ингэснээр иргэн Н.Энхбаярт холбогдох эрүүгийн хэргийн мөрдөн байцаалтын ажиллагаанд өмгөөлөгч оролцох боломжтой болж байна.