Б.ЧУЛУУДАЙ ”ХОНШООРТОЙ ЗАГНАНА”

Та бүхний харж байгаа, дэгжин залуу бол Б.Чулуудай. Харин урлаг, уран сайхныхан болоод ойр дотныхон нь түүнийг Чугу гэдгээр нь бүр ч сайн мэднэ. Б.Чулуудай бол Төрийн Шагналт, Ардын Уран Зохиолч Сэнгийн Эрдэнэ агсны ач хүү, Нийслэлийн Засаг Дарга бөгөөд Улаанбаатар Хотын Захирагч, Монгол Улсын Баатар Э.Бат-Үүлийн хүү.

Харин Б.Чугу өөрөө "Гранд Лайн" компаний Ерөнхий Захирал, тун чиг овжин, өсөж яваа, залуу бизнесмен. Дараа жил гэхэд Баянзүрх дүүрэгт залуу гэр бүлийн хороолол барихаар энэ салбарт хүч үзэж яваа тэрээр урлагт "элэгтэй" нэгэн учир энэ жилийн "To be or Not to be" театрчилсан шоуны ялагчийг хоёр өрөө байраар мялаана гэсэн. Учир нь энэ жилийн наадам Төрийн Шагналт, Ардын Уран Зохиолч Сэнгийн Эрдэнийн мэндэлсний 85 насны ойд зориулагдаж байгаа бөгөөд Монголынхоо зохиолчдыг алдаршуулж, тэдний зохиол бүтээлийг хойч үедээ өвлүүлэн үлдээх зорилготой.

Тийм ч учраас Б.Чулуудай "To be or Not to be"-гийн ялагчид ирэх жил ашиглалтанд орох, өөрийн барьж буй хорооллоосоо хоёр өрөө байрыг амлажээ. Түүнчлэн Гран-Пригийн эзнийг өвөөгийнхээ мэндэлсэн Хэнтий аймгийн түүх дурсгалт газруудаар аялах эрхийн бичгээр ч шагнан урамшуулах ажээ. Өнөөдөр Б.Чугу "Сэнгийн Эрдэнэ Сан"-гийн Удирдах Зөвлөлийн Гишүүнээр ажилладаг ба театрчилсан шоуны ялагчийг ийнхүү өндрөөр "байлсан" нь ёстой л "хоншоортой загнаж", өвөөгийнхөө ач буяныг үргэлжлүүлж байгаа юм.