ГАВЬЯАТ ЖҮЖИГЧИН, СУРГАН ХҮМҮҮЖҮҮЛЭГЧ

Хичээлийн шинэ жилийн нээлт гэдэг бол хүүхдүүдийн хувьд төдийгүй багш, сурган хүмүүжүүлэгчдийн хувьд ч томоохон баяр билээ. Тэгвэл энэ удаад бид Монгол Улсын Гавьяат Жүжигчин Л.Чаминчулууныг папараци дурандаа буулгалаа. Хэзээний "хүүхдэрхүү" донжийг бүрдүүлдэг тэрээр энэ удаад цэнхэр цамцыг цэнхэр цэцгэн зүүлттэй хослуулжээ.

СУИС-даа хамгийн "хатуу" багшид тооцогддог тэрээр тайзны ярианы багшаар ажилладаг. Хичнээн дүрсгүйтэж, шаагилдаж, хөлхөлдөн явсан хүүхдүүд "Чамиа багш" гэхэд л пирхийтэл зугтаан алга болдгийг тус сургуулийн үе үеийн төгсөгчид одоо хэр нь ярих дуртай.

Өнөөдрийн урлагийн тогоонд "чанагдаж" яваа олон сайхан авьяастнуудыг төрүүлэн гаргасан МУГЖ Л.Чаминчулуун багш цаанаа л өөрийн гэсэн өвөрмөц байдал, гайхам авьяастай хүн. Ээжийн тухай өгүүллэгийг нь сонссон хүн нулимс унагахгүй байхын аргагүй. Яруу сайхан өгүүлэмжээрээ уйлуулж бас инээлгэж чаддаг гавьяат багшийн яруу алдар бадартугай.