Бейонси дахин хөл хүнд болжээ

Сүүлийн үед олны анхаарлыг татаад байсан хөгжмийн ертөнцийн сэтгэл татам хосуудын нэг дуучин Бейонси, рэппэр Jay-Z нар дахин хүүхэдтэй болж байна. Тэд нарыг хоёрдахь хүүхдээ төрүүлэх гэж буй тухай сенсаци таамаг төдий байсан бол алдартай хосыг тойрсон ээлжит цуурхал батлагдаж байгаа бололтой. Саяхан Америкийн алдартай “E! News” Бейонси, Jay-Z нарыг хоёрдахь хүүхдээ төрүүлнэ хэмээн мэдээлж, дуучин бүсгүйг Бельгид болох аялан тоглолтоо цуцалсан нь ч мөн түүний бие давхар болсонтой холбоотой хэмээн мэдээлжээ. 

Харин хосуудын талаар ийнхүү мэдээлэл цацагдсаны дараа рэппэр Рассель Саймон тэргүүтэй тэдний дуу хөгжмийн ертөнцийн ойр дотны найзуудаас “баяр хүргэе” гэсэн үгс твиттерээр аль хэдий жиргээд эхэлсэн байна. Дуучин Бейонсийг ийнхүү дахин хөл хүнд болсон талаар “New York Post” хамгийн анх мэдээлсэн гэнэ. Поп дива анхны охиноо өнгөрөгч оны нэгдүгээр сард төрүүлсэн билээ.