Хамтлагаасаа хөөгдөхгүйн тулд үсээ хусуулж, интернэтээр уучлал гуйжээ

Японы АКВ48 хамтлагийн гишүүн Минами Минегиши хамтлагаасаа гарахгүйн тулд үсээ хусуулж, уучлал гуйсан бичлэгээ “Youtube”-ээр цацаж шуугиан тариад байна. Минами бол 2005 онд байгуулагдсан, 90 шахам охидоос бүрддэг АКВ48 хамтлагийн ууган гишүүдийн нэг. Уг хамтлагийн продюсерээр ажилладаг компани хамтлагийн гишүүн охидыг хөвгүүдтэй болзож, үерхэхийг нь хориглодог ажээ. Гэтэл Минами Минегиши саяхан найз залуугийнхаа гэрт хоноод гарч явахыг нь хэвлэлийхэн олж хараад, зургийг нь нийтэлчихжээ. Энэ мэдээллийг хэтэрхий эмзгээр хүлээн авсан Минами хамтлагаасаа хөөгдөнө гэж айгаад үсээ хусч. Японд эртнээс уламжилж заншлаар үсээ хусуулах нь алдаа гэмшлээ ухаарч байгааг илтгэдэг ажээ. Тэрээр үсээ хусаад зогсохгүй хамтлагаасаа гармааргүй байна гэдгээ уйлж хайлан гуйсан бичлэгээ Youtube-д тавьсан нь зарим фэнүүдийнх нь өрөвч сэтгэлийг хөдөлгөсөн бол, зарим хүн түүнийг дарангуйллын нийгэмд амьдарч байгаа мэт огт хэрэггүй үйлдэл хийлээ хэмээн шүүмжилж байна.