Ертөнцийн төгсгөл…

Эртний индианчууд болох майя нарын 2012 оныг дуустал боловсруулсан хуанлид өгүүлэгдэх зөгнөлүүдэд дэлхийн олон зуун сая хүмүүс итгэж байгаа аж. Майя нар 2012 оны 12 дугаар сард ертөнцийн төгсгөл ирнэ гэж зөгнөсөн билээ. Үүнд дэлхийн хүн амын аравны нэг нь итгэж, үхэлдээ бэлтгэж суугаа гэнэ. Ipsos компанийн явуулсан асуулгад дэлхийн өнцөг булан бүрт амьдран суудаг 16 мянган хүн оролцжээ.

Майячуудын зөгнөлд хамгийн ихээр итгэж байгаа хүмүүс бол хятадууд аж. Тус улсын иргэдийн хорь гаруй хувь нь энэ оны сүүлээр дуусгавар болно гэдэгтээ итгэчихсэн суугаа юм. Тэгвэл үүнд хамгийн бага итгэж байгаа улсууд бол ОХУ болон Польшийн иргэд гэнэ. Гэхдээ тэд ч гэсэн ирээдүйнхээ талаар ихэд сэтгэл зовниж суугаа аж.

Канадын хүн амын ердөө тавхан хувь нь удахгүй ертөнцийн мөхөл ирнэ гэдэгт итгэж байгаа юм. Тэдэн дунд Брюс Бич гэдэг хүн байгаа билээ. Мань эр өнгөрсөн зууны 70-аад оноос хойш газар дор бүхэл бүтэн цогцолбор нуувч барьж байгаа юм. Тэрбээр өөрийн баталгаатай нуувчинд хүссэн хүн болгоныг орогнуулах бодолтой байна. Гэхдээ юун түрүүнд эмэгтэйчүүд болон хүүхдүүдэд энэ боломжийг олгох гэнэ.

Сонирхолтой нь, манай гарагийн долоон хүн тутмын нэг нь ойрын ирээдүйд буюу түүнийг амьд сэрүүн байхад ертөнцийн төгсгөл ирнэ гэж үзэж байгаа аж. Тэр хүмүүсийн дийлэнх хувь нь 35-аас доош насны боловсрол болон орлогын хэмжээ, түвшин багатай улсууд байгаа гэнэ. Майячуудын хуанли 5125 жилийг хамарсан бөгөөд 2012 оны 12 дугаар сарын 21-ний өдөр дуусгавар болох юм.

Тэгвэл Америкийн гэрэл зурагчин Jill Greenberg  үүнтэй холбогдуулан  “End Times” нэртэй гэрэл зургаа толилуулжээ.