“ЭРДЭНЭС ТАВАНТОЛГОЙ” ХК-ИЙН БОРЛУУЛАЛТ 76%, ЭКСПОРТ 58.7% ӨСЛӨӨ

“Эрдэнэс Тавантолгой” ХК 2026 оны 5 дугаар сарын 12-ны өдрийн байдлаар нийт 14.4 сая тонн нүүрс борлуулж, 980.6 сая ам.долларын орлого олсон нь өмнөх оны мөн үеэс 1.8 дахин буюу 76%-иар өслөө. Борлуулалтын орлого өмнөх оны мөн үед 582.4 сая ам.доллар байсан бол энэ онд 1.7 дахин буюу 68%-иар өсөж 980.6 сая ам.долларт хүрлээ.

БИРЖИЙН БОРЛУУЛАЛТ 2025 оны эхний 5 сард 1.1 сая тонн нүүрс биржээр арилжаалж байсан бол 2026 оны мөн үед 7.5 сая тоннд хүрч, өмнөх оныхоос 6.7 дахин өсөв. Үүнийг даган биржийн борлуулалтын орлого 88.8 сая ам.доллароос 7.1 дахин өсөж, 630.9 сая ам.долларт хүрсэн байна.

НҮҮРС АЧИЛТ 2026 оны 5 дугаар сарын 12-ны байдлаар өдөрт 109 мянган тоннд хүрсэн нь өмнөх оны үеэс 1.8 дахин өслөө. Үүнээс биржээр арилжаалсан нүүрсний ачилт 54 хувийг эзэлж, өмнөх оныхоос 3.9 дахин нэмэгдлээ. Ордыг сорчлон олборлож, борлуулахгүй байх бодлогын хүрээнд хатуу коксжих нүүрсний нийт ачилтын эзлэх хувийг буурууллаа. 2025 онд нийт ачилтын 66 хувийг эзэлж байсан хатуу коксжих нүүрсний хэмжээг 2026 онд 37 хувь болгон бууруулав.

БИРЖИЙН ЭКСПОРТ 2026 оны 5 дугаар сарын 12-ны байдлаар 7.7 сая.тоннд хүрсэн нь өмнөх оны мөн үеэс 4 дахин өслөө. Ханги-мандал боомтоор 2.5 сая тонн, Гашуунсухайт-Ганцмод боомтоор 11.9 сая тонн экспортоллоо.

Нийт экспортыг 2025 оны мөн үетэй харьцуулахад 58.7%-иар өссөн үзүүлэлттэй байна.

Компани олборлолт, борлуулалтын оновчтой бодлого хэрэгжүүлснээр Монгол Улсын гадаад валютын нөөцийг зузаатгах, төсвийн орлогыг тогтвортой бүрдүүлэх замаар улс орны нийгэм, эдийн засгийн өсөлтөд бодит хувь нэмэр оруулан ажиллаж байна.