Ч.Лодойсамбуу: Гадаадын банк оруулж ирэх нь эдийн засгийг бүхэлд нь гадаадын нөлөөнд оруулах эрсдэлтэй

УИХ-ын гишүүн Ч.Лодойсамбуу Монгол Улсад гадаадын банк оруулж ирэх замаар зээлийн хүү бууруулах бодлогын талаар байр сууриа илэрхийлсэн байна. Тэрбээр уг саналыг оны өмнө Монголбанкны Ерөнхийлөгчийг томилох үеэр илэрхийлж байжээ.

Түүний хэлснээр, Монгол Улсад зээлийн хүү өндөр байгаа шалтгааныг гадаадын банк байхгүйтэй холбож тайлбарлах нь үндэслэлгүй бөгөөд уг асуудлын гол эх үүсвэр нь Засгийн газрын хэт үрэлгэн, харалган төсөв, түүнээс үүдсэн өндөр инфляци, инфляцийг тогтоон барихын тулд Монголбанкнаас хэрэгжүүлж буй өндөр бодлогын хүүтэй шууд холбоотой гэж үзэж байна.

Ч.Лодойсамбуу гадаадын банкуудыг зах зээлд оруулснаар дараах эрсдэл үүсэхийг онцоллоо. Үүнд:
• Дотоодын банкууд гадаадын томоохон банкнуудтай өрсөлдөж чадахгүй болж, зах зээлээс шахагдах эрсдэлтэй.
• Гадаадын банкууд бага хүүтэй зээл олгох замаар Монгол Улсын гол салбаруудыг хяналтдаа авах, барьцаа хөрөнгүүд гадагш урсах нөхцөл бүрдэнэ.
• Гадаадын банкны ашиг Монголын эдийн засагт үлдэхгүй, гадагшаа шилжинэ.
• Монголбанк гадаадын банкуудын үйл ажиллагааг бүрэн хянах боломж хязгаарлагдмал.

Тэрбээр зээлийн хүүг бууруулах асуудал нь дан ганц Монголбанкны бодлогоор шийдэгдэх боломжгүй бөгөөд Засгийн газар төсвийн сахилга баттай байж, төлөвлөлтөө бодитой хийх, үр ашиггүй болон улс төрийн шинжтэй зардлуудаа танах замаар шийдвэрлэх ёстой гэдгийг онцолсон байна.

Мөн “гадаадын банк оруулж ирэх нь зээлийн хүү бууруулах эерэг нөлөөнөөсөө илүүтэй эдийн засгийн аюулгүй байдалд эрсдэл дагуулна” хэмээн дүгнэжээ.