Нийслэлийн хэмжээнд цэргийн бүртгэл маргааш хаагдана

Нийслэлийн хэмжээнд цэргийн бүртгэл энэ сарын 7-ноос эхэлсэн. Цэргийн бүртгэл нэгдүгээр сарын 23-нд хаагдана.  Иргэд оршин суугаа газрынхаа хороонд болон цахим үйлчилгээний нэгдсэн портал “E-Mongolia”-гаар хүсэлтээ илгээн бүртгүүлэх боломжтой. Ажлын өдөр 08:00-17:00, амралтын өдөр 09:00-16:00 цагийн хооронд бүртгэнэ.

Цэргийн үүрэгтний үнэмлэх аваагүй 18 хүртэлх насныхан харьяа баг, хороон дээрээ өөрийн биеэр очиж бүртгүүлэх шаардлагатай.

Цэргийн үүрэгтний үнэмлэхээ үрэгдүүлсэн бол аймаг, дүүргийн цэргийн штабт өөрийн биеэр хандана. Түүнчлэн шилжилт хөдөлгөөн хийсэн иргэд оршин суугаа аймаг, дүүргийнхээ цэргийн штабт бүртгэлээ хийлгэж, баталгаажуулна.

Тухайн иргэн завгүй, гадаад, дотоодод томилолттой яваа бол ар гэрийн төлөөлөл нь иргэний үнэмлэх, цэргийн үүрэгтний үнэмлэхийн хамт харьяа баг, хороон дээрээ авч очиж бүртгүүлэх боломжтой байна.

Зөрчлийн тухай хуулийн 15.17 дугаар зүйлд зарласан хугацаанд цэргийн бүртгэлд хамрагдаагүй иргэнийг 100 нэгжтэй тэнцэх хэмжээний буюу 100,000 төгрөгөөр торгоно гэж заажээ.