Их хэмжээний авилга авсан гаалийн байцаагчдыг саатуулан шалгаж эхэлжээ

Нийгэмд шударга ёсыг тогтоож, авлига албан тушаалын гэмт хэрэгтэй тэмцэхээр эхэлсэн ажлын хүрээнд улсын төсөвт их хэмжээний хохирол учруулж, улсын хөрөнгийг хувьдаа завшсан байсан нь урьдчилсан байдлаар тогтоогдсон гаалийн байцаагчдыг Тагнуул, Цагдаагийн байгууллагаас илрүүлэн саатуулжээ.

Улаанбаатар хотын гааль, Замын-Үүдийн нэр бүхий 20 орчим гаалийн улсын байцаагчид бусадтай үгсэн хуйвалдах замаар олон удаагийн үйлдлээр зуучлагч иргэдтэй үгсэн хуйвалдаж улсын төсөвт төвлөрөх ёстой гаалийн татварын орлогоос 13.5 тэрбум төгрөгийг зувчуулсан байж болзошгүй үйлдлийг цагдаагийн байгууллага илрүүлэн шалгаж байна.

Гаалийн байгууллага улсын төсөвт татвар, хураамж хэлбэрээр орлого төвлөрүүлэх үүрэгтэй. Гэтэл сүүлийн хоёр жилийн хугацаанд 131 аж ахуйн нэгжийн импортын барааны үнийн дүнг хууль бусаар нуун дарагдуулж, улсын төсөвт төвлөрөх ёстой байсан их хэмжээний татварын орлогыг бууруулж, хувьдаа завшсан бүлэг этгээдүүдийг Тагнуул, цагдаагийн байгууллагаас ийнхүү шалгаж эхэлжээ.