Ч.Номин: МҮОНРТ-ийн үзэгчдээс авдаг хураамжийг нэмэгдүүлэх ёстой

УИХ-ын Төрийн байгуулалтын байнгын хорооны хуралдаанаар Олон нийтийн радио, телевизийн (МҮОНРТ) Үндэсний зөвлөлийн 2024 оны үйл ажиллагааны тайланг хэлэлцэв.

УИХ-ын гишүүн Ч.Номин энэ үеэр “Өв соёлоо үр хойчдоо түгээж, бага насанд нь таниулахад МҮОНРТ-ийн оролцоо маш чухал. Тиймээс үзэгчдээс авдаг хураамжийг нэмэгдүүлэх ёстой гэж үздэг.

Үндэсний зөвлөл, гүйцэтгэх захирлын тайлан хангалтгүй байна. Гүйцэтгэх захирлын тайлан нь газрын даргын түвшний, Үндэсний зөвлөлийн тайлан нь гүйцэтгэх захирлын хэмжээний байна. Өнөөдөр бид үр дүн, дүгнэлт ярьж байх ёстой. Та бүхний тайлангаас дүгнэлт гаргахад хэцүү байна.

Уг нь хүний нөөц, үйл ажиллагаа, ямар нэвтрүүлэг хийж байгаа, үзүүлэлт нь ямар байгаа, санхүүгийн байдал, үзэгчдээс авсан хураамжийнхаа хариуд ямар үнэ цэн бий болгож байгаа тухайгаа тайлагнах ёстой. Гэтэл процессын тайлан л ирүүлжээ. Ямар ч үр дүн, өгөөж танилцуулахгүйгээр тайлан ирүүлж байна. Үр өгөөжөө харуулбал төсөв нэмэхээс эхлээд дараагийн боломжууд гарч ирнэ” гэв.

МҮОНРТ-ийн Гүйцэтгэх захирал Г.Гэрэл "2024 оны эхэнд 5.8 тэрбум төгрөгийн үйл ажиллагааны алдагдалтайгаар байгууллагыг хүлээж авсан бөгөөд улсын төсвийн дэмжлэггүй байсан тул алдагдлыг даван туулахад хүндрэлтэй байсан.

Өнөөдрийн байдлаар манай телевизэд 512 хүн ажиллаж байна. Өмнөх өр авлагын шалтгаан нь орлогоо шийдэж чадаагүй байж, цалин нэмэх шийдвэр гаргасантай холбоотой. Улсын төсвийн дэмжлэгээр энэ асуудлыг шийдвэрлэсэн. Цаашид орлогын эх үүсвэрээ өөрийн боломжид тулгуурлан шинэчлэх, сайжруулах аргыг эрэлхийлэн ажиллаж байна” гэв.