Монголын хүчтэн эмэгтэй М.Анхцэцэгийн баярт үдшийнх нь гангараа

Энэ оны Монголын шилдгийн шилдэг эмэгтэй тамирчнаар ОУХМ М.Анхцэцэг тодорсон билээ. Тэрээр уг баярт өдрөөрөө Монгол дээлээрээ гангарчээ. Эгэл даруу эгэлгүй хүчтэн эмэгтэй маань энэ үдшийн хамгийн үзэсгэлэнт нь байсан юм. М.Анхцэцэг нь Өнгөрсөн жил үрийн зулай үнэрлэсэн тэрбээр энэ оны дөрөвдүгээр сараас бэлтгэлээ хийж эхэлсэн. Улмаар насанд хүрэгчдийн Азийн дэд аварга болж, ДАШТ-ээс хоёр дахь хүрэл медалиа хүртсэн юм. Тэрээр хэлэхдээ   “Спорт гэдэг асар их хүч хөдөлмөрөөр бүтдэг. Энэ бол нэг хүний амжилт биш. Үүний ард байгаа Монголын хүндийг өргөлтийн холбоонд зүтгэсэн үеийн үеийн зүтгэлтнүүд, дасгалжуулагчид, тамирчид, ивээн тэтгэгчдийн шагнал юм шүү. Ц.Хосбаяр багшдаа, намайг өсгөж хүмүүжүүлсэн аав, ээждээ, ханьдаа баярлалаа.

Би “Бөртэ чоно” шагналыг дөрөв дэх удаагаа хүртлээ. Өнгөрсөн жил үрийн зулай үнэрлээд өнжсөн. Хэдхэн хоногийн өмнө аав, ээж хоёр минь надад “2018 онд миний охин амьдралынхаа хамгийн том “Бөртэ чоно”-ыг хүртсэн юм шүү” гэсэн. Та нартаа баярлалаа. Долоо хоногийн дараа Дэлхийн цомын тэмцээнд оролцоно. Намайг шилдгийн шилдэг тамирчнаар тодруулсан Монголын спортын сэтгүүлчиддээ баярлалаа. Токиогийн олимпын эрх авахын төлөө хичээнэ” хэмээн хэлсэн нь олны сэтгэлийг ихэд хөдөлгөсөн юм.