Холливудын одод хэдэн арван сая доллараар кинонд тоглодог үе өнгөрчээ

Холливудын одод хэдэн арван сая ам.доллараар кинонд тоглодог үе ард хоцорч байгааг хамгийн өндөр орлоготой жүжигчдийн нэг Брэд Питт зарлалаа. Тэрээр BBC телевизэд ярихдаа “Одоо маш сонирхолтой цаг үе ирээд байна. Өмнөх шиг өндөр хөлсөөр кинонд тоглодог үе төгсгөл болсон. Энэ цаг үед хүн бүр л санхүүгээ тогтвортой байлгах гэж хичээж байна” гэжээ.  Холливудын оддын хувьд өндөр цалин хөлсөөр кинонд тоглодог цаг өнгөрсөн гэж байгаа ч ямартай ч нэг киноноос 10 сая орчим ам.долларын хөлс авдаг хэвээр байгаа юм. Гэвч энэ нь Брэд Питтээс эхлээд А зэрэглэлийн жүжигчдийн хувьд чамлалттай санагдах нь аргагүй юм. Тэрээр өнгөрсөн онд 25 сая ам.долларын орлого олсон бол Том Круз 75 сая ам.долларын орлогоор Холливудын бүх жүжигчдээ тэргүүлж байна.