АТГ-т шалгаж байсан Ё.Отгонбаярт холбогдох үйлдлийг хэрэгт нь нэгтгэв

УИХ-ын гишүүн Ё.Отгонбаярыг эрүүгийн хэрэгт сэжигтнээр тооцож, УМБГ-т шалгаж байна. Түүнийг Налайх дүүргийн харьяат, “Тавин лан” компанийн захирал Х.Цогнойжамцыг дарамтлан “Ланд Круйзер-200” маркийн автомашиныг нь дээрэмдэж, авлига нэхсэн гэх үйлдлээс гадна эхнэрийнх нь мөнгө угаасан хэрэгт холбогдуулан сэжигтнээр тооцоод буй гэнэ. Налайх дүүрэгт барилга барьж, улсын комисст хүлээлгэн өгөхийн тулд авлига санал болгосон гэх Х.Цогнойжамц хилээр гарч явсан тухай мэдээлэл байгаа юм. Замын- Үүдийн боомтоор хил давсан тэрбээр “Болдог юм болдгоороо болно биз. Би тайлбар өгөх албагүй” гэж хэлээд явсан гэх. УИХ-ын гишүүн Ё.Отгонбаярын дээрх хэргүүдээс гадна АТГ-ын Мөрдөн шалгах хэлтэст шалгаж байгаад түдгэлзүүлсэн хэргийг сэргээн шалгахаар болсон гэнэ. Өнгөрсөн долоо хоногийн дундуур АТГ-аас түүнд холбогдох хэргийг УМБГ-т шалгаж буй хэрэгт нь нэгтгэхээр шилжүүлсэн талаар баттай эх сурвалж мэдээллээ. 

АТГ-т Ё.Отгонбаярын Боловсрол, соёл, шинжлэх ухааны сайдаар ажиллаж албан тушаал, эрх мэдлээ урвуулж, мөнг ө завшсан байж болзошгүй хэргийг шалгаж байгаад түдгэлзүүлсэн аж. Тиймээс Ё.Отгонбаяртай холбоотой хэргүүдийг нэгтгэн УМБГ-т шалгаж байсан бөгөөд улмаар АТГ-тай хамтарсан Ажлын хэсэг гаргаж дахин шалгахаар болжээ.