Б.Бат-Эрдэнэ: Би хэлний жаахан авьяастай

Ерөнхийлөгчид нэр дэвшиж буй хүн даяаршлын гол хэл англи хэлтэй байх ёстой гэсэн нэгэн гаж гэмээр ойлголтыг зарим хүмүүс гаргаж тавьдаг.

Тэгвэл нэр дэвшигч Б.Бат-Эрдэнэ нэгэнтээ “Би хэлний жаахан авьяастай шүү, худлаа гэвэл англи, оросоор надаас юм асуугаад үзэх үү” хэмээн аархжээ. Тэрээр цааш нь ярихдаа: 

-“Ерөнхийлөгч бол төрийн тэргүүн. Төрийн хэл бол эх сайхан монгол хэл маань. Тэгэхээр ерөнхийлөгчийн бүх ажил эх хэл дээрээ явна. Ер нь бол манайхан хэл сурах хэрэгтэй л дээ. Гэхдээ хамгийн гол нь ерөнхийлөгч ч бай жирийн иргэн ч бай зөвхөн эх хэлээрээ л сэтгэдэг. Тийм учраас Монгол Улсын ерөнхийлөгчид нэр дэвшиж байгаа монгол хүн англи хэлгүй байна гэдэг сул тал болно гэж би бодохгүй байна. Тэгээд ч би бас тийм хоосон амьтан биш шүү. Би хэлний жаахан авьяастай гэх үү дээ. Англи хэлийг өөрөө бие дааж сурсан. Сурахаас ч өөр арга байгаагүй. Яагаад гэвэл гадаадад олон тэмцээн уралдаанд явж эхэлсэн. Бас Жүдогийн холбооны тэргүүнээр ажиллаж, Азийн жүдогийн холбоонд сонгуульт ажил хийж байсан учраас англи хэл сурах шаардлагатай байсан. Тэгээд л сурсан даа. Англи хэл үзэж цагаашрахад Э.Тэмүүжин, Ж.Отгонцагаан гээд миний найзууд тусалж байлаа” хэмээн ярьжээ.