Замын-Үүд сумын удирдлагууд 116 сая төгрөгөөр 8 камер авчээ

Дорноговь аймгийн Замын-Үүд сумын Засаг даргын Тамгын газрынхан 116 сая төгрөгөөр 8 ширхэг камер худалдаж авсан гэх мэдээллийг хэд хэдэн эх сурвалж  хэлэв.

Уг нь 2022 онд тус суманд  сервер болон камер суурилуулахад зориулж мөнгө төсвлөсөн ч хийхгүй байсаар 2023 он шувтрах дөхөж байхад сая нэг юм  хагас дутуу гүйцэлдүүлсэн байна. Гэхдээ нам, чив чимээгүй байсан хэрнээ “12 настай охин”-ы асуудал яригдаж эхэлмэгц үтэр түргэн амжуулжсан нь энэ аж.

Ингэхдээ 116 сая төгрөгөөр ердөө 8 ширхэг камер худалдан авсанд иргэд нь дургүйцэж буй юм. Авсан 8 ширхэг камерын нэг бүрийн үнэ нь монгол төгрөгөөр 14 сая  500  мянга гэж байгаа бөгөөд бүхэл бүтэн сумыг 8 камераар хянаж чадах эсэх нь бас л асуудал юм.

Өмнөд хөршөөс авсан гэх эдгээр тооны камерын үнэ үнэхээр олны анхаарал татаж байгаа аж.  Мэдээж Хятад улстай хил залгаа байдаг иргэдийн хувьд  камер ямар үнэ ханштайг төвөггүй мэдчихэж байгаа тул  тийнхүү хэлж буй ч биз.

Эх сурвалжуудын хэлж буйгаар хамгийн сайн нь буюу 5000 метрийн зай дахь дүрс татдаг камер 1800 орчим юань буюу монгол төгрөгөөр бол 1 сая орчмын үнэтэй. Харин 500-1000 метрийн зайныхыг татдаг, 360  градус эргэдэг камер нь 1000-1500 юань буюу монгол төгрөгөөр 500-750 мянгын үнэтэй сервер нь хамгийн сайн багтаамжтай нь гэхэд л 30 сая орчим төгрөг  гэдгийг хэлж байв.

Гэтэл Замын-Үүд сумын ЗДТГ-ынхан авсан 8 ш камерынхаа үнийг 2-3 дахин, серверийнхээ үнийг ч бас хэд дахин өсгөн тайлагнаж суугаа нь “Төсвийн хэмнэлт” яригдаж буй энэ цаг үед төр засгийнхаа эсрэг ажиллаж байна гэж харагдаж байгаа юм.

Тэгээд ч 2022 оны 12 сард явуулсан тендрийн ажил ийнхүү бараг жилийн дараа биеллээ олохдоо иймэрхүү дүр зурагтай байх жишээтэй.

Үргэлжлэл бий...