​ Хандивын бус хариуцлагын аян хэрэгтэй байна

Үер, усны гамшигт нэрвэгдсэн иргэдэд зориулж хувь иргэнээс эхлээд төрийн болон төрийн бус байгууллагууд хандивын аян өрнүүлсээр байна.

Угтаа бол хатуу ч гэлээ бидэнд хандивын бус хариуцлагын аян л дутаад байна. Сар гаруйн өмнө болсон үер голын гольдролыг өөрчилсөнтэй холбоотой байсан. Энэ нь мэдээж холбогдох албан тушаалтнууд хууль бусаар зөвшөөрөл олгож, нийслэл цементэн ширэнгэ болсонтой холбоотой. Авлигын асуудал ч яригдаж, хуулийн байгууллагууд шалгаж буй.

Харин энэ удаагийн уруйн үер бол далан, шуудууг хог, шороогоор дүүргэж, сууршлын бүс болгон хашаа, байшин барьснаас үүдэлтэйгээр үүссэнийг мэргэжилтнүүд хэлж байгаа.

Үерт нэрвэгдсэн иргэд, айл өрхүүдэд тусламж нэн шаардлагатай байгаа нь үнэн. Гэвч бүхнийг бусдаар үйлдүүлж амьдарсаар байх уу гэдгийг тунгаах л учиртай.

Ядаж л үерт өртсөн айл, өрхүүдийг зөвшөөрөлгүйгээр оршин сууж байгааг анхааруулж, газар чөлөөлж, нүүхийг холбогдох байгууллагууд нь шаардсан ч хэдэн жил “гүрийчихсэн” тохиолдол олон байна. Тэдэнд хариуцлага, үүргээ ухамсарлах гэсэн ойлголт байсангүй.

Яг үүнтэй адил.

Өнөөдөр идэх, өмсөхөөс эхлээд эдийн засгийн тусламж үзүүлж буй хандивлагчид олон байна. Харамсалтай нь танаас тусламж, дэмжлэг авсан хүмүүсийн хэд нь иргэний үүргээ биелүүлдэг бол гэдгийг бас тооцоолж харж, үнэлж үзмээр байна.

Хандивын бус хариуцлагын аян өрнүүлж, төр болоод иргэнээс хуулиа биелүүлэхийг шаарддаг болсон цагт бид давагдашгүй хүчин зүйлийн өмнө сөхрөх бус урьдчилан сэргийлэх чадамжтай болох биш үү.