Өөрөөр сэтгэе, Монголчууд аа

БНСУ-ын 29 настай контент бүтээгч, Plus size модель Ssun Biki өөрийн багийн хамт Монголд аялж байна. Амтай хүн бүхэн тэдний тухай цуурч, сошиал ч хэд хоног гоо бүсгүйчүүдээр амьсгалав. Тэд хөдөө, орон нутгийн аяллаа дуусгаад одоо нийслэлд байгаа.
Тэгвэл өчигдөр буюу долдугаар сарын 25-ны өдөр БОАЖ-ын сайд Б.Бат-Эрдэнэ, Аялал жуулчлалын бодлого зохицуулалтын газрын дарга П.Баттөр болон албаны хүмүүс тэднийг хүлээн авч уулзсан байна. Ингэхдээ БНСУ-д алдартай, салбар бүрийн инфлүүнсерийг Монгол Улсад аялуулах, тэднээр дамжуулж Монгол орны онцлог, дөрвөн улирлын аялал жуулчлалыг сурталчлах, хамтран ажиллах талаар санал солилцсон байна.
Гэвч сайдын энэ үйлдэл иргэдийн дургүйцлийг хүргээд амжлаа. Олон нийтийн зүгээс зүгээр л нэг жуулчдыг сайд нь хүлээн авч уулзаж, улсын аялал жуулчлалын бодлого ярилцана гэдэг нь өөрсдийгөө доромжилсон хэрэг хэмээн олон нийт үзэж, сошиалд шуугьж байна. Гэхдээ шүүмжлэхээ урьтал болгох юун.
Угтаа бол Монгол Улс 1 сая жуулчин хүлээж авах төлөвлөгөөтэй байгаа. Тэр дундаа Өмнөд Солонгосоос 150 мянган жуулчин хүлээж авах тооцоолол гарсан. Хэдийгээр бид энэ тоонд хүрч амжаагүй байгаа ч тухайн улсын алдартнууд манай улсыг зорьж байгаа нь нэг амжилт юм. Plus size модель Ssun Biki өөрийн багийн аяллын тухай 3 цуврал нэвтрүүлэг Солонгост гарна. Үүгээр дамжуулж Монгол орны тухай сайхан сэтгэгдэл өгч, олон хүнийг Монгол орон руу аялах хүсэл төрүүлэх боломжтой гэж моделиуд ч ярьж байсан. Монголчууд бид хэзээ байтлаа зочин гийчнийг буруу харж угтаж байлаа. Зориод ирсэн алдартай жуулчдад сайхан сэтгэгдэл төрүүлэх нь манай улсын аялал жуулчлалын хэтэд ч тустай биз ээ.