МИАТ ТӨХК ОРОН НУТГИЙН НИСЛЭГЭЭ 15 ЖИЛИЙН ДАРАА ДАХИН ЭХЛҮҮЛЛЭЭ

Манай улс 1956 оны 7 дугаар сарын 7-ны өдөр АН-2 агаарын хөлгөөр зорчигч шуудан тээврийн анхны тогтмол нислэг хийж эхэлсэн нь өнөөгийн Үндэсний агаарын тээвэрлэгч МИАТ ТӨХК-ийн түүхийн эхлэл гэж үздэг бөгөөд МИАТ компани 2008 он хүртэл орон нутгийн нислэг үйлдсэн. 

Монгол Улсын Засгийн газраас аялал жуулчлалын салбарыг эдийн засгийн тэргүүлэх эгнээнд авч үзэн 2023-2025 оныг “Монголд зочлох жил”-ээр зарлаад байна.

2023-2025 оныг Монголд зочлох жил болгосонтой холбогдуулан МИАТ ТӨХК 2008 онд зогсоогоод байсан орон нутгийн нислэгээ дахин сэргээж 9 аймгийн чиглэлд шууд нислэг үйлдэхээр болж, өнөөдөр 15 жилийн дараа дахин нисэх гэж байна. МИАТ компани ийнхүү орон нутгийн чиглэлд нислэг үйлддэг болсноор гадаад орны аялал жуулчлалын гол бүс нутгууд руу тав тухтай, түргэн шуурхай аялах боломжтой болж байна. 

МИАТ компани 15 жилийн дараа дахин эхлүүлж байгаа орон нутгийн нислэгт зориулан ӨАБНУ-ын СЕМ AIR компаниас CRJ-200 маягийн агаарын хөлгийг нойтон түрээсээр авч байгаа бөгөөд МИАТ компани CRJ-200 агаарын хөлгийг анх удаагаа нислэг үйлдвэрлэлдээ ашиглаж байна. 

Иргэний нисэхийн ерөнхий газрын дарга Ч.Мөнхтуяа

"Тус компани 15 жилийн дараа орон нутгийн хуваарьт нислэгээ эхлүүлж буй. Нийт есөн чиглэлийн нислэгийн хуваарь төлөвлөсөн. Мөн Засгийн газраас иргэний нисэх тээврийн олон улсын статустай буюу Ховд, Мөрөн, Чойбалсан, Алтай, Даланзадгадын нисэх буудлын хүчин чадлыг сайжруулах байх гэсэн хүлээлттэй байгаа" гэв.