Яллагдагч нарын БҮРЭН ЭРХИЙГ ТҮДГЭЛЗҮҮЛ

Олон нийтийн анхаарлын төвд буй Хөгжлийн банкны болон нүүрсний гэх тодотголтой хэргүүдэд УИХ-ын нэр бүхий гишүүд холбогдож, яллагдагчаар татагдсан.

Одоогоор Ж.Мөнхбат, Т.Аюурсайхан, Н.Наранбаатар, Д.Бат-Эрдэнэ, А.Адъяасүрэн, Б.Энх-Амгалан нарын нүүрсний хэргийн яллагдагчид.
Харин Н.Алтанхуяг, Г.Амартүвшин, Х.Ганхуяг, Ё.Баатарбилэг нар Хөгжлийн банкны хэргийн яллагдагчид.
Энэ хүмүүсийг бусад яллагдагчтай ижил түвшинд буюу УИХ-ын гишүүний бүрэн эрхээс түдгэлзүүлэх хэрэгтэй, шаардлагатай. Үүний баталгаа нь Хөгжлийн банкны шүүх хурал. Түүнд яллагдагчаар татагдсан УИХ-ын гишүүн Г.Амартүвшин.

Тэр Хөгжлийн банкны гүйцэтгэх захирлын албыг хэдхэн сар хашихдаа хичнээн тэрбумын хохирол учруулсан нь өнөөдөр ил болчхоод байна. Гэтэл ердөө санахгүй байна, мэдэхгүй байна хэмээн уцаарлаж, бусдыг загнаж байгаа нь УИХ-ын гишүүн болчихсон гэдэг “том” халхавчны араас ёстой л “дунд хуруу” өгч байна гэлтэй байна.
Дээрх нэр бүхий яллагдагч нараас Ж.Мөнхбат өөрийн хүсэлтээр чөлөөлөгдсөн бол Т.Аюурсайханыг чөлөөлөөд байгаа.
Харин бусад нь чөлөөлөгдөх вий гэх айдастайгаар холбогдсон гэмт хэргүүдийнхээ шүүх хурлуудаас гэм буруугүй хэмээн нэр цэвэр үлдэхээр “чичирсээр” суугаа шүү.
Тэд өмнө нь албан тушаалын байдлаа ашигласнаар л бусдын боломжийг хулгайлж, өөрсдөдөө давуу эрх олж авсан. Тиймээс ч өнөөдөр яллагдагч болчихсон яваа.
Яг түүнтэй адил өнөөдөр ч тэд шүүх хурлын танхим хийгээд гэмт хэрэг шалгах явцад албан тушаалын байдлаа ашиглан, эрх мэдэлтнүүдийн “эгнээнээс” том дуугарч байна.